世間的光／鄭英兒牧師

1. 耶穌道成肉體真實成做世間的光拯救全人類：
路加2：25-26描寫西面是敬虔的義人，一直啲期待以色列的復興；聖神有及他同在。聖神對他啟示，佇他死以前一定會看到主所應允的基督！聖神感動西面進入聖殿，看見耶穌的父母約瑟及馬利亞照摩西律法的慣例，欲將頭生的查埔子耶穌獻互上帝。西面用雙手抱耶穌稱讚上帝：「主啊，今照祢的話，互祢的奴僕平平安安離開世間；因為我已經有親目看著祢的拯救，就是祢佇萬民面前所準備的。伊做啟示外邦人的光，做祢的子民以色列的榮光。」
約翰8：12耶穌對眾人講：「我是世間的光，隨我的人佇黑暗中生活，反
轉有活命的光。」
約翰1：9「有一個真的光進入世間來照全人類。」或是「啲照全人類的真光來到世間。」約翰1：4-5「佇祂內面有活命，這個活命是人類的光。這個光佇黑暗中啲照，黑暗呣曾贏過光。」

2. 咱著盡力分享、見證世間的光成做全人類的盼望：
路加2：34~35記載西面給（約瑟、馬利亞及耶穌）祝福，閣對嬰仔的老母馬利亞講：「這個嬰仔受設立是欲互以色列中真多人跋倒，真多人爬起來，閣成做受攻擊的記號，互真多人心內的意念露現；你本身的心嘛會互利劍刺透過。」西面預告耶穌基督道成肉體，通過祂的犧牲及受苦成做全人類的盼望，總是耶穌的母親馬利亞做耶穌的至親會面對耶穌死亡至大的苦痛及哀傷！
馬可10：45耶穌講：「因為人子呣是來欲互人服事，反轉是欲給人服事。甚至犧牲自己的生命來贖回真多人。」這是耶穌清楚肯定自己的「生命觀」及「人生觀」，亦是告白自己的「服事觀」及「價值觀」！

馬太5：14~16耶穌講：「恁是世間的光。人若點燈著放佇燈台上，通照光厝內所有的人。親像按呢，恁的光著照佇人的面前，通互看見恁的好行為來榮光恁的天父。」

願咱做基督徒的一生，攏盡力、打拼分享、見證耶穌基督是世間的光成做全人類的盼望，這就是聖誕節耶穌基督降生賞賜人類大歡喜的「好消息」及「佳音」！