盼望的見證／鄭英兒牧師

路加1:67-79
2012.12.09

今日是今年待降節第二主日，亦是「普世聖經紀念主日」，明仔日亦是聯合國所訂「世界人權日」。當咱佇準備迎接耶穌基督的降生，咱亦閣卡確信耶穌的道成肉體賞賜全人類「生命的盼望」亦提醒咱學習上帝對每一個生命的疼惜、慈愛及關懷，這亦是「人權」的精神及意義！這期3171期教會公報的社論：「教會應重視聖經並關懷人權」，呼籲眾教會及基督徒閣卡確信---「聖經是教會的根基」，咱應該遵行聖經的話語，關懷並實踐人權。這特別互我想起總會教社委員會所發行的「生命更豐盛的展現-上帝的話與人權」這本真特別、有關「人權」的查經手冊。原來是美國基督教協會（NCCC）及美國聖經公會共同出版，因為史麥利羅伯特牧師（Robert F. Smylie）（美國長老教會前駐聯合國聯絡人）送這本冊互羅榮光牧師，羅牧師看完深深感覺它互咱基督徒對聖經來了解人權有真大的幫助。後來徵求出版者同意以及台灣聖經公會的翻譯，佇1999年5月出版中文譯本，當時我擔任教社委員會負責幹事，這本冊出版後寄送總會所屬每一間教會及機構，鼓勵使用，若教會各團契需要攏免費贈送，期待閣卡多的基督徒佇聖經上帝的話清楚看見亦深刻體驗上帝對人類「生命及人權」真實無比的疼痛！

今早起咱做伙研讀路加1：67-79，通常佇待降節卡少人注意的聖經節，總是咱看見施洗者約翰出生的時，通過他的老父撒迦利亞互聖神充滿所講的預言，引導咱做伙學習「盼望的見證」的信仰課題：

1. 感謝、確信上帝的拯救及恩典：
路加1：68-79撒迦利亞的預言通分做2部分，第1部分68-75節的主題就是謳咾、感謝閣確信上帝的救贖及恩典！一開始68-69節預言講：「著稱讚主以色列的上帝！因為伊有看顧閣救贖伊的子民。伊對伊的僕人大衛的家，給咱設立一位有大氣力的拯救者。」然後通過以色列族群的歷史回顧，重新確信上帝對的列祖直到現今的拯救及恩典！70-75節繼續預言講：「照伊佇古早通過伊聖先知的嘴應允講：伊欲拯救咱脫離咱的對敵，脫離一切怨恨咱的人的手。伊應允欲憐憫咱的祖先，閣記得伊所立神聖的約，就是伊對咱的祖亞伯拉罕所立的約。伊欲救咱脫離對敵的手，互咱沒驚惶，一世人佇伊的面前，用聖潔及公義服事伊。」
進前天使加百利佇聖殿對撒加利亞講上帝應允欲互他的某以利沙白懷孕生一個後生（查埔子），閣著號名做約翰。總是因為撒迦利亞想著夫婦攏年老欲怎樣生子，因為信心不足，天使互他啞口講話，直到這事應允的時（路加1：5-25）。後來約翰出生的時，欲給囝仔號名，眾人請問撒迦利亞，他用寫字板寫「約翰」以後，佇大家著驚的時，他閣恢復會出聲講話並稱讚上帝（路加1：57-64）。撒迦利亞會講話以後，互聖神充滿繼續講出預言，並且內容就是謳咾、感謝上帝對以色列人的救恩，對祖先佇歷史中的經驗、體會上帝就是信實的上帝，保守、照顧、疼惜、保護以色列族群。雖然以色列已經滅國600多年，總是上帝一定差派一位大氣力的拯救者來救贖以色列人。撒迦利亞的預言互以色列族群通過歷史的回顧以及上帝的眷顧展望亦確信上帝此時的拯救及恩典！

2. 分享、見證生命的拯救及盼望：
路加1：76~79撒迦利亞預言的第2部分的主題特別講起施洗者約翰的任務及責任：「細子啊，你會互人稱呼做至高上帝的先知；因為你會做主的先鋒來準備伊欲行的路，互依的子民，因為罪得著赦免通明白上帝的拯救。因為咱的上帝溫柔慈悲，清早的日頭會對天頂照咱。照咱這些佇黑暗及死亡蔭影下的人，引導咱的腳行入和平的路。」

聖經學者發現「約翰」這個名字的意思是「上主是恩慈的」，「耶穌」這個名字的意思是「上帝是拯救」！約翰出生以後的生長過程，根據路加1：70記載講：這個囝子漸漸大傼，心靈日日勇壯。他佇曠野，一直到他佇以色列人的中間公開出現彼日。路加3：3記載後來約翰大傼後，上帝的話臨到他，他就去約旦河一帶逐所在宣揚講：「著悔改，領受洗禮，上帝就赦免恁的罪！」雖然有真多人接受約翰的洗禮，但是約翰真清楚閣確信對群眾及欲接受洗禮的人講：「我用水給恁行洗禮，呣久有一位比我卡有權能的啲欲來，我連給伊解鞋帶to堪得。伊欲用聖神及火給恁洗禮。」約翰明白自己的角色及使命，他沒互群眾誤會他是「基督」──拯救者，約翰清楚他是主的先鋒，他欲準備耶穌基督所行的路，通互上帝的子民接納閣經驗上帝的拯救，對耶穌基督的死及復活互信靠的人類罪得著赦免亦得著「復活的新生命」！

施洗者約翰的一生，對他出生的開始到後來殉道佇希律王手中（馬太14：1~12，馬可6：14~29），他盡忠佇上帝託付的使命及責任──分享、見證生命的拯救及盼望！約翰呣那為耶穌基督做「開路先鋒」，閣卡重要他盡力、打拼分享、見證耶穌基督賞賜全人類生命的拯救及盼望。約翰的出生亦是預告閣準備耶穌基督的降生，2個「新生命」攏為著分享閣見證「上帝國的真理及救恩」，2位亦通過一生的所行所做互「上帝國」日日廣闊，引導閣卡多人類通過耶穌基督的救恩得到「生命的盼望」！
每年12月是咱眾教會及基督徒共同的「人權教育月」以及「人權實踐月」，呣那是因為12月10日是聯合國制定的「世界人權日」，亦因為耶穌基督降生提醒、要求咱落實「世界人權宣言」！無論聯合國制定12月1日是「世界愛滋日」，12月3日是「身心障礙者日」，抑是咱台灣基督長老教會制定12月第1主日是「愛滋關懷主日」12月3日是「身心障礙者關懷日」攏一再勉勵咱「疼惜生命、關懷人權」！這亦是咱教會每個月第2個禮拜一暗時「國際特赦組織」（AI）台灣第1組聚會簽署「救援信」聲援世界各國「人權鬥士」的努力及實踐。

2011年12月9日暗時咱台灣基督長老教會佇總統府前凱達格蘭大道舉行「紀念世界人權日，為台灣祈禱會」，雖然落雨，全台有700~800位牧長及信徒參加（咱義光教會33位兄姊）。昨日（12月8日）下晡「環島苦行救台灣」經過36日（11月3日~12月8日）苦行進駐凱達格蘭大道，真多台灣鄉親參加公投護台灣聯盟發起「救扁義勇軍」以及台北公義行動教會信徒做伙全台苦行，堅持「打破司法獨裁－救阿扁、救司法、救台灣」，帶領全台苦行的總指揮蔡丁貴教授12月8日半暝佇凱道為著舞台搭建問題受傷，目前佇台大醫院急診治療；現場由鄭國忠牧師負責指揮。對這個情境咱沒記得今年12月10日是「美麗島事件」33周年，上帝閣一遍提醒咱台灣基督長老教會觀「釘根佇本地，認同所有的住民，通過疼及受苦，成做盼望的記號」的使命及責任！