佇主疼痛內面／鄭英兒牧師

聖詩36首「上帝的恩惠慈悲」的歌詞是對日本聖詩翻譯做台語，特別將「台語的媠」佇3節歌詞中清楚表達，咱教會兄姊已經吟唱真多遍，期待咱每一遍佇歡喜、敬虔的心告白上帝的恩惠慈悲-極高無地比、極深無地比、極闊無地比！尤其今日是全世界的教會及基督徒共同學習亦見證的「感恩節主日」。雖然「感恩節」的歷史及起源是及美國歷史有密切的關係，特別亦及英國、歐洲的新教徒面對宗教壓迫不得不離開家園前往「北美新大陸」尋找「上帝賜福的新天新地」的過程沒法度分開。1620年「五月花號」（Mayflower）載102人歷經風浪、危機，辛苦歷經大西洋去到北美的朴里茅斯港，開創佇北美洲的「新天新地」亦是現今世界強國「美國」（United States of America）歷史的起源。美國人民的先祖得著在地原住民印地安人的關心、協助才漸漸安定、徛起佇「上帝賜福的迦南地」，所以到北美週一年後邀請印地安人做伙慶祝並獻上滿心的感恩，這是世界歷史上第一次的「感恩節」！後來形成的傳統及慣例就是每年11月第4週的禮拜四成做當年的「感恩節」！

今日咱所研讀猶大書17-23節是11月24日每日新眼光的聖經節。猶太書只有1章，一般佇新舊約的全本聖經常常受忽略，今早起咱有機會通過猶太書做伙學習怎樣努力共同的信仰課題---佇主疼痛內面：

1. 時刻反省、檢討自己信仰；沒成做別人的阻礙：
猶大書的作者，寫作時間及地點，收批的對象對書信的內容真困難找到答案。猶大書12節按呢寫：「我是耶穌基督的奴僕，雅各的兄弟姊妹，我寫批互那些受上帝選召，得到父上帝的疼，受耶穌基督保守的人。願上帝豐豐富富賜恁憐憫、平安及慈愛！」大多數聖經學家沒法度確定猶大書的作者是叨一位「猶大」（新約聖經出現8個猶大），亦沒法度確定是叨一位雅各。總是對初代教會傳統、背景及現況推測，作者若有可能得到當時教會及基督徒接納，應該是耶穌的小弟猶大，亦是初代教會耶路撒冷會議中的教會領袖雅各（耶穌的小弟）（參考徒15：13）的弟弟。總是收批的對象是初代各教會通輪流學習，時間可能佇主後70年之前。猶大書重要的信仰課題，是針對當時已經通過耶穌基督的救恩得著重頭生的基督徒，但是因為教會內面對的混亂及困難，猶大懇求上帝豐豐富富的憐憫、平安及慈愛賞賜加添互（第2節）。這是猶大書及保羅書信的請安上大的沒仝款。

猶大書面對初代教會的基督徒，因為基督信仰的根基沒穩定，致到受到真多異端（諾斯底主義否認人的肉體及耶穌的道成肉身）及假教師的影響。第8節按呢描寫：相款，這些空思妄想的人嘛有損壞自己的身軀，藐視上帝的權威，污辱天頂那些尊榮者。亦親像18~19節猶大提醒使徒預言的話：「佇末日，有一寡趁自己沒敬虔的慾念做代誌的人會出現，愛恥笑別人的信仰。這些是製造紛爭，受本性支配，沒及聖神結連的人。」猶大舉舊約以色列人的實例：該隱、巴蘭、可拉（11節）受上帝咒詛及刑罰的情形提醒初代教會基督徒當時常反省，檢討自己的信仰免得造成教會內的兄姊以及其他人的阻礙！

2. 佇主疼痛內面，盡力成做上帝歡喜的兒女：
猶大書17~23的標題：「現代台語譯本：警告及教訓」（紅皮漢羅版本：警告及教訓）（台語漢羅版本：警告及勸勉）。猶大書的內容大多數是作者對初代教會基督徒的警告、提醒（4~19），其中包括引用次經：第9節有關天使長米迦勒的記載是引用「摩西升天記」，14-15節有關：「主會導千千萬萬的聖天使來，欲審判所有的人，刑罰一切沒敬虔的罪人，因為用沒敬虔的方法做一切沒敬虔的事，閣講褻瀆上帝的話。」是引用「以諾書」或「以諾壹書」。

總是第3節互咱看出猶大對初代教會基督徒熱切的關懷：「親愛的朋友，我早就一直愛欲寫批互恁，及恁談論咱攏有份的拯救。我感覺這陣隨時需要寫批給恁鼓勵。愛恁為著上帝只有一遍就夠額傳授互祂子民這個信仰繼續奮鬥。」後來繼續佇20-23節猶大提出4點具體對基督徒的信仰勉勵以及如何關懷教會內有問題的信徒。佇20-21節猶大對當時的基督徒提出四點勉勵，猶大稱呼：「親愛的朋友」：
（1） 著將自己建立佇至聖的信仰頂面。
（2） 著靠聖神祈禱。
（3） 著佇上帝的疼保守自己。
（4） 仰望咱的主耶穌基督的憐憫，直到得到永遠的活命。

佇22-23節猶大亦分享對「問題基督徒」的關懷：
（1） 對心存僥疑的信徒，著憐憫。
（2） 對一寡人，著對火中給救出來。
（3） 對另外一寡人，著憐憫，呣久著自己警戒，連互情慾沾到的衫嘛著厭惡。
猶大確信真正跟隨耶穌的基督徒一定是時刻佇上帝的疼盡力活出基督的香味（見證）！（紅皮漢羅版：「繼續在上主的寵愛中生活。」）佇每日的生活倚靠聖神的引導祈禱，及上帝建立親密的關係，並且建立上帝期待閣歡喜的生命，就是一生跟隨基督，時刻榮光上帝、祝福眾人的「基督信仰」！

11月19日參加「七星中會牧師、傳道師、牧師娘在職訓練會」，有一個時間是牧師、傳道師、牧師娘分組分享牧會生活的體驗。佇我參加這一組大多數是年輕的傳道師，大家彼此分享「牧會中最喜樂的事！」我有分享佇咱義光教會牧會七年最喜樂的事-基督信仰帶互兄姊、信徒生命的喜樂及盼望！（我特別思念2011年11月17日安息主懷的昭堂兄，他對基督信仰的敬虔、謙卑的態度，以及聖神同在的平安及喜樂。）

聖詩609首「佇主疼痛內面」台語歌詞是我的爸爸鄭連德牧師負責翻譯，這首聖詩亦是10月28日我的媽媽鄭陳淑文牧師娘（嬤）佇平安園安葬禮拜大家做伙吟的聖詩。雖然真思念今年離開阮家庭的2個人（小慈及媽媽），總是閣卡感恩上帝的權能、攝理及旨意，時刻提醒咱-佇主疼痛內面，做主盡忠奴僕！