信靠上帝／鄭英兒牧師

感謝聖歌隊吟唱我的母親鄭陳淑文牧師娘（嬤）真愛吟的聖詩「境遇好壞是主所定」，這首聖詩亦是10月19日她安息主懷的時，佇病房所有的牧師、長執、兄姊及阮親人共同吟唱送別她的聖詩。新聖詩612首將詩名及第一句改做：「境遇好壞變化無定」，互咱閣卡體會基督徒人生及生命面對一切的經歷，雖然變化無定，咱歡喜告白萬事攏是上帝旨意，祂亦時時刻刻引導咱，照顧咱，包括肉體病痛、艱苦亦體驗上帝無盡的恩典及疼痛！

佇頂禮拜（10月28日）下埔台北東門教會舉行我媽媽追思告別禮拜，當我代表遺族致謝，原來我準備放潘茂涼長老吟的詩歌「感謝祢的疼」（今年母親節主日禮拜聽過一遍），總是為著節省時間就省略，今日主日講道的開始，請咱做伙通過這首詩歌學習亦紀念我的媽媽「感恩的人生」！

今早起咱研讀2段聖經節，其中列王記下卷22：8-20是今年10月31日每日新眼光的聖經節，每年10月31日是「宗教改革紀念日」，通過馬丁路得對當時教會腐敗的反省、檢討提醒咱每一時代的教會及基督徒共同的信仰責任及課題：

1. 謙卑認錯、誠實悔改、歸向上帝：
有關猶大王約西亞相關的記載佇舊約列王記下卷22：1-23：30以及歷代志下卷34：1-35：27。今早起咱研讀王下22：8~20真清楚看見約西亞王整修耶路撒冷聖殿的時陣，無意中發現以色列列祖所保留「律法的冊」（類似「申命記」的作品）。後來書記沙番讀這本律法冊的內容，真可能讀到親像申命記28：15~68的記載，約西亞王聽到非常著驚！王下22：11~13記載約西亞王就拆裂伊的衫，並吩咐一群祭司講：「恁去為我、為百姓、為猶大眾人，將所拾著此本冊的話問耶和華；因為耶和華大受氣咱，是因為咱的列祖無聽趁此個冊的話，無照一切所記載論咱的來行。」後來去見女先知戶勒大，她講：「因為棄拺我，燒香佇別個上帝，用的手所做的激我的受氣，所以我受氣此所在，親像火火著 無息。」（王下22：17）
約西亞王是南國猶大345年歷史（主前931-586）20個國王中，真正用心、用生命、謙卑悔改、帶領全國以色列人再次歸向上帝的君王。雖然他8歲做王，在位31年，39歲佇米吉多戰場互埃及王尼哥刣死。總是他在位第18年26歲的時陣，勇敢堅持宗教信仰的基本改革，帶來整個南國猶大的改變！

約西亞王面對上帝的責備及警醒，他謙卑認錯，誠實悔改，歸向上帝；閣卡重要，他確信全體以色列人攏必須要反悔認罪，忠實及上帝建立信仰生命關係，整個國家、社會、民族才有前途及盼望！對自己的信仰、生命反省帶動全民的宗教改革及心靈更新。列王記下卷23章有記載約西亞王引導全國人民的宗教、信仰、生命、生活...的改革及更新，國家及人民一切建立佇及上帝忠實的信仰結連，萬事就看見光明的未來。佇王下23：25真重要的結論記載：「佇約西亞以前並無有王親像伊盡心、盡性、盡力歸向耶和華，照摩西一切的律法，佇伊以後也無出一個王親像伊。」

2. 信靠上帝、盡忠服事、榮神益人：
列王記下23：1-3記載約西亞王聚集猶大及耶路撒冷的眾長老。約西亞王上耶路撒冷聖殿，猶大眾人及徛起耶路撒冷的百姓，及祭司、先知、眾百姓，無論大細，攏做伙去；王就將聖殿內尋找的冊一切的話獨互聽。約西亞王徛佇柱邊，佇耶和華的面前立約，欲盡心、盡性順趁耶和華，守伊的誡命及干證的話、以及律例，來成就此本冊所記立約的話。百姓攏承認此個約！咱清楚看見約西亞王怎樣對自己做起，引導全國人民信靠上帝，盡忠服事，這就是「宗教改革」的「信仰更新」以及「生命實踐」！
教會歷史上重要的「宗教改革」攏必須付出犧牲及受苦的代價！耶穌基督「道成肉體」來到世間，祂一生的生命見證，祂佇十字架所完成的救贖及恩典，祂犧牲自己生命為犧牲全人類。親像耶穌佇馬可10：45明確的告白：「因為人子呣是來欲互人服事，反轉是欲給人服事，甚至犧牲自己的生命來贖回真多人。」耶穌佇上帝的權能贏過死亡，對死復活，見證「全能、永活的上帝」！

1517年10月31日馬丁路得佇威登堡禮拜堂大門貼出95條抗議文，指出當時教會的腐敗及不義，亦按呢開始世界教會歷史上重要的「宗教改革」。馬丁路得面對當時天主教教皇所建立非常大的宗教制度及組織，祂清楚自己的力量真小，總是佇他的基督信仰他信靠上帝的氣力，確信上帝欲引導、保守、帶領他的生命及行動，成就「上帝國的信仰及見證」！當咱吟馬丁路得所作聖詩603首「上帝作咱安全要塞」，咱就閣卡體會他怎樣堅持信靠上帝，勇敢為主交戰，雖然面對世間邪惡勢力，肉體、生命艱難、困苦，倚靠上帝咱就一定贏！

10月27日早起佇七星中會松年部22屆年會及23屆幹部、委員選舉中間，我受邀請通過路加12：22-31用「平安及喜樂」鼓勵年長的兄姊做伙「信靠上帝」分享咱所經驗的「平安及喜樂」互上帝的主權、疼痛及公義落實佇咱台灣鄉土、同胞及全世界人類！現代台語譯本路加12：22-31標題：「信靠上帝」，29-31節耶穌按呢提醒門徒及咱每一位基督徒講：「所以，恁呣通干單啲想欲吃什麼，飲什麼，嘛呣通操煩！這個攏是這世間沒信的人所啲追求的。顛倒著代先追求祂主權的實現，這些物件就攏會續互恁。」

「宗教改革紀念日」閣一遍提醒咱一生的信仰課題：「信靠上帝、盡忠服事、榮神益人。」願咱佇聖詩618首「咱著信靠上帝」第3節歌詞互相勉勵、代禱及重新決志：「今阮無論死活，傳報真理無息，宣揚救主疼痛名字，直到臨終彼時；主祢知阮軟弱，鑒察念頭、私慾， 求祢助阮軟弱腳手，逐時扶持保守。」