生命的主／鄭英兒牧師

聖詩608首「奇妙恩典何等甘甜」（Amazing grace ! How sweet the sound）是咱真熟的聖詩，過去沒收集佇聖詩中間，感謝上帝2009年新出版的聖詩已經翻做台語聖詩，互咱閣卡通過這首聖詩告白上帝「無盡的恩典及疼痛」成做「我人生及生命的救贖、依靠及盼望」！

這期耕心週刊第843期主題：「驚喜連連」--封面對「改變生命的10種祈禱」這本冊引用一段話，尤其是最後一句見證講：「有時陣，上帝會對最歹（上沒好）的情形中，帶互咱上大、上豐富的快樂」！佇咱基督徒的人生是呣是真正按呢體會上帝的恩典及賜福？這期耕心週刊第一篇見證：「救恩，接二連三」，是咱吉峰教會陳束琴姐妹的信仰告白；咱欲看見佇她人生的經歷，車禍意外撞傷小傼囝仔、先生佇船頂工作受重傷，雖然面對家庭的阻力及困難，夫妻倆人欲接受洗禮猶沒法度，總是相信只要信靠上帝，一切困難上帝會開路，因為已經親身體驗上帝是「生命的主」！

今早起咱做伙研讀馬可10：46-52，咱亦閣一遍佇耶穌基督的勉勵及教示中間做伙學習「生命的主」的信仰課題：

1. 看見閣確信賞賜救恩「生命的主」：
馬可10：46-49咱看見耶穌及門徒欲離開耶利哥成的時陣，有一位失明的乞食叫做巴底買（底買的子）坐佇路邊。他聽講耶穌對遐經過，就喊講：「大衛的子耶穌，憐憫我！」四周圍的人責備他，叫他呣通叫，著。總是巴底買顛倒閣卡大聲喊講：「大衛的子，憐憫我！」耶穌聽見巴底買的叫聲就停腳，講：「叫他來！」
巴底買是一位失明的盲人，亦因為生活的困難他成做向人討食生存的乞食。總是咱佇這段記載清楚他的心靈並沒失明，佇他的生命及身心靈需要耶穌基督的關心、疼惜及救恩！巴底買稱呼耶穌是「大衛的子」，真多聖經學家認為作者馬可（包括馬太及路加福音亦是仝款的記載）欲提醒耶穌的學生、以色列宗教領袖、神職人員以及群眾，對巴底買的稱呼及認知，他確信耶穌是舊約先知所預言的彌賽亞救世主的身分，耶穌基督是全人類的救主！所以巴底買呼求、懇求耶穌憐憫他，拯救他的生命。對一位失明的盲人巴底買他的懇求及呼聲，互咱每一世代的基督徒學習他的生命及心靈並沒失明，巴底買「看見」閣「確信」耶穌基督就是全世界人類的救主，所以甚至別人責備他，阻擋他，拒絕他，巴底買甚至閣卡堅持欲得到「生命的主」--耶穌基督賞賜的救恩！跟隨耶穌身邊的門徒、經學士、祭司、群眾豈有這種「看見」及「確信」？！

2. 渴慕、積極的行動親近「生命的主」：
馬可10：49-50記載耶穌聽見巴底買的呼聲，就講：「叫他來！」群眾就去對巴底買講：「安心，起來！祂啲叫你。」巴底買聽到就將外衣掉，跳起來，來到耶穌遐。聖經清楚記載巴底買這個盲人，他聽見人轉達耶穌叫他去的話，他通過3個動作（或是動詞）將（1）外衣掉（2）跳起來（3）行到（或是有人牽他？或半走半行？或四周圍的人輪流扶他？）聖經沒詳細記載這個過程。總是咱清楚看見巴底買的生命所展現的那種渴慕、積極的行動來親近耶穌！雖然他是盲人閣是討食的乞食，行動非常沒方便閣困難，總是他表達內心的歡喜、堅持及渴慕，所以他想盡可能的方法，趕緊去到耶穌的身邊，因為巴底買相信此時是他生命得到改變及盼望的機會，他積極把握這個「契機」及「轉機」，巴底買的「生命行動」清楚表明他對「生命的主」的渴慕及期待！

3. 清楚體驗並獻身跟隨「生命的主」：
馬可10：51-52記載耶穌面對巴底買的反應，耶穌了解巴底買對祂救主身份的確信，閣看見巴底買渴慕積極親近的生命行動。耶穌就對巴底買講：「你愛我給你做什麼？」巴底買應講：「我的拉比，互我會閣看見！」（紅皮漢羅版：「老師，互我閣再有看見。」）（台語漢羅版：「拉波尼，我愛得著看見。」）巴底買的「生命及心靈」的目睭已經看見救世主耶穌，但是主耶穌關心他，請問他的需要及期待，巴底買非常肯定、確認他此時此地真實的需要就是肉體目睭會當恢復視力，通看見耶穌閣通欣賞上帝創造奇妙的世界及宇宙萬物！巴底買並沒要求金錢、財富、地位、名聲或權力，他只有謙卑閣清楚自己盼望閣通「看見」！
對照馬可10：36-38耶穌仝款對雅各及約翰講：「恁愛我給恁做什麼？」講：「你得著榮光的時，請互阮一個坐你的正旁，一個坐你的左旁。」耶穌對2人講：「恁呣知自己啲求什麼！」雅各及約翰是耶穌身邊主要的門徒，日日隨佇耶穌身邊，經驗耶穌的權能趕鬼、醫病、教示勉勵人閣關懷生命，總是竟然猶沒清楚耶穌的身份，亦沒了解耶穌所欲建立「上帝國的真理」；的人性及自私只有停留佇世界的價值觀。

耶穌面對巴底買清楚的期待及信心，耶穌對他講：「你轉去。你的信心互你得著醫好啦！」耶穌肯定並積極回應巴底買對祂的確信及渴慕，耶穌權能醫治互巴底買隨時閣通「看見」！互眾人著驚的事是巴底買閣看見以後，就歸路隨耶穌！巴底買呣那清楚體驗耶穌是「生命的主」，他閣卡進一步歡喜、甘願，即時獻身跟隨「生命的主」--耶穌基督！

耶穌藉著巴底買的「生命事件」以及「委身跟隨主的見證」提醒、教育祂的門徒及咱每一位基督徒的信仰課題，願咱的一生攏常常清楚體驗上帝及咱「生命拯救的關係」並且時刻歡喜獻身跟隨「生命的主」--耶穌基督！這亦是我的母親鄭陳淑文牧師娘（牧師嬤）留落互阮上重要的生命及信仰見證！