生命的選擇／鄭英兒牧師

馬可10：17-31
2012.10.14

聖詩113首咱長老宗（長老教會、歸正教會、改革宗教會）的創始人加爾文牧師所寫的聖詩，咱做伙閣一遍齊唸1、3、5節的歌詞成做咱共同的信仰告白：
第1節：我來朝見祢，救贖我的主，我唯一倚靠，所欣慕救主；為著可憐我，祢曾受苦痛，阮一切掛慮，求祢來解放。
第3節：祢就是活命，阮對祢生存，一切的恩惠，才能祢所分；求你將信仰，權能扶持阮，賜阮有氣力贏試煉、純全。
第5節：除去祢以外，別位無向望，主祢有應允，所信無空空；求賜阮平安、自在及確信，對祢得氣力，互阮永堅心。
馬可10：17~31耶穌提醒咱對3方面重新思考咱成做基督徒「生命的選擇」：

1. 我豈歡喜全然放棄來跟隨基督？
面對忠誠遵守誡命閣真實追求永活的活命的以色列人，馬可10：21耶穌注目看他、疼他，對他講：「你猶欠一項；你去，去賣所有的來分互散赤人，你佇天頂就有財寶；然後來隨我。」青年人聽見耶穌的話，面就失色，憂憂愁愁離開，因為他財產真多！
咱若欲成做得到永遠活命的基督徒，咱亦必須面對「生命的選擇」──咱豈歡喜全然放棄來跟隨基督？咱豈願意犧牲、受苦、背十字架？咱豈真正甘願放棄錢財、地位、名聲、權力......真實跟隨耶穌基督？

2. 確信上帝的權能凡事攏會！
耶穌的門徒著驚耶穌所講的話：「有錢人入上帝國偌呢啊困難！」耶穌閣進一步講：「駱駝鑽過針鼻嘛比好額人入上帝國卡簡單。」門徒對耶穌的話議論紛紛，甚至質疑講：「若按呢，什麼人會當得著救？」馬可10：27耶穌注目看，講：「這個事，人做到，上帝就呣是按呢，因為上帝逐項攏會。」
耶穌的門徒雖然時常聽見耶穌的教示及勉勵，並且親目看見耶穌行真多神蹟醫治病痛閣趕鬼，但是猶原沒法度明白耶穌提醒宣告上帝國的真理，特別沒法度確信上帝的權能凡事攏會。耶穌的門徒經過多多造就及訓練，猶原沒法度明白、了解上帝國的真理。
咱做基督徒，佇人生及生命的學習，著怎樣經驗、確信閣告白「上帝的權能凡事攏會」！

3. 勇敢承擔使命，同心拓展上帝國：
馬可10：28彼得對耶穌講：「阮已經放拺一切來隨你。」雖然彼得真有勇氣代表所有的門徒告白「生命的選擇」，但是耶穌閣卡重要進一步教示、提醒──真實用生命跟隨祂的人會得到的應允及賜福：(1)為著基督及福音的緣故放拺厝宅、兄弟、姊妹、老母、老父、子兒及田園的任何人，雖然有面對迫害，佇今世會得到百倍的賜福。(2)佇來世今得著永遠的活命。(3)真多第一的會做上路尾，上路尾會做第一。
耶穌勉勵祂的門徒及每一時代的基督徒──攏著勇敢承擔使命，同心拓展上帝國！

「2012台灣加入聯合國宣達團」深刻的感受：
(1)及「熱比婭」見面，感受它生命力的熱情及堅持，為著維吾爾族（東土耳其斯坦）的自由、平等及獨立，雖然面對迫害、艱難犧牲及困苦，猶原勇敢、打拼、奮鬥她「生命的選擇」！

(2)參觀「路德˙馬丁˙金牧師紀念公園」，2011年8月28日落成開放，紀念48年前（1963年8月28日）美國黑人佇華府舉行「為工作及自由的遊行」以及路德˙馬丁˙金牧師出名的演講：「我有一個夢」（I Have A Dream）。「路德˙馬丁˙金牧師紀念公園及雕像」是目前首都華府地區唯一呣是紀念美國總統或是戰爭英雄的雕像，是紀念一位為著民權及和平奮鬥的平民行動主義者，亦是世界歷史中一位偉大的非暴力運動的領袖。
路德˙馬丁˙金牧師確信他「生命的選擇」堅持他「十字架的道路」成做「上帝盡忠的奴僕」！