新創造的人／鄭英兒牧師

1. 時刻歡喜閣積極為基督來活：
林後4：1~6：13保羅特別提醒「宣教及傳福音」的主題，保羅呣是鼓勵全職的傳教者，保羅是確信每一位基督徒攏是「基督使徒」，攏有傳福音及宣教的職責！林後4：7保羅告白講：「不過阮這些有這個屬靈寶貝的人，是親像土做的器具，欲表示那個至大的能力是屬佇上帝，呣是對阮出來的。」保羅清楚咱攏是土做的軟弱閣不足的生命，但是上帝呼召、揀選咱每一位基督徒，通過祂的同在及同行，賞賜咱屬靈的能力，互咱攏通成做「上帝國真理」的傳報者及分享者！

林後5：11-21標題是：「通過基督及上帝和好」。11節保羅講：「既然阮知樣著敬畏主，阮就苦勸人。對上帝來看，阮是什麼款人真清楚；我盼望對恁的良心來看嘛真清楚。」13節繼續講：「阮若沒正常，是為著上帝；阮若正常，是為著恁。」佇14-15節保羅提出真重要的勉勵：「因為基督的疼痛催迫阮做一個結論：一人為著眾人死，眾人就攏死。伊為著眾人死，是欲互那些活啲的人沒閣為著自己活，是為著彼位替死了復活的基督來活。」保羅確信耶穌基督為著世界人類的罪過受釘死十字架，咱若相信、接納，咱就及耶穌基督同死亦同復活。咱基督徒通過耶穌基督死閣復活的「救恩」，已經得著亦經驗「重頭生閣復活的新生命」，親像一個「新創造的人」。

上重要的提醒，保羅要求每一位已經經驗基督復活生命的基督徒，咱的人生及生命就沒閣為著自己來活，是必須要時刻歡喜閣積極為基督來活！保羅通過基督信仰按呢「自我要求」，保羅亦仝款要求每一時代的每一位基督徒，咱的「生命觀」及「生命主權」已經交互上帝，咱佇基督徒的「天路歷程」應該努力「時刻歡喜閣積極為基督來活」！

2. 真實建立及上帝和好的關係
林後5：17-18保羅真清楚亦真肯定告白講：「按呢，沒論什麼人，若及基督結連，就是新創造的人，舊的已經過去，今攏變成新的。這些一切攏是上帝的作為；祂通過對基督互咱及祂閣和好，閣將互人和好的職務交代阮。」（紅皮漢羅聖經：無論什麼人若及基督結合，伊就是新的受造物：就是舊的已經過去，新的來啊。 這些一切攏是上主做的。伊通過基督將咱這些敵人變做伊的朋友，又閣賞賜咱這個職務，通互其他的人也來做伊的朋友。）保羅通過自己親身體驗「上帝救恩及基督信仰」確信每一位基督徒若接納閣結連耶穌基督，咱已經成做「新創造的人」，咱亦應該學習建立及上帝和好的關係！咱人因為犯罪破壞及上帝和好的關係，當咱信靠耶穌基督佇十字架頂完成「普世人類的救恩」，咱的罪過及耶穌已經同死，咱經驗「對死復活」的「生命盼望」，這是咱所欲見證「新創造的人」，亦是及上帝建立和好關係的生命！

林後5：19-21保羅提醒3項事：
（1）19節保羅講咱分享的福音就是：上帝通過基督互世間人及祂和好，沒閣追究人的罪過。
（2）20節保羅宣告自己坐基督的大使，上帝國真理的分享者，咱著替基督對人類懇求---著及上帝和好。
(3)21節保羅閣一遍告白：上帝互沒罪的基督為著咱人類成做有罪，互咱人類通靠基督及上帝建立合宜的關係。（紅皮漢羅版：「......，這是為著欲互咱因為及伊（基督）結合，來分享上主的公義。」）

保羅確信──當咱及基督結連，就成做新創造的人，咱著真實建立及上帝和好、合宜的關係！當咱按呢努力打拼，上帝會時刻更新、造就、訓練咱「屬靈的生命」，咱日日成做「基督的精兵」以及「上帝盡忠的奴僕」！
這期第830期「耕心週刊」主題：「特別的查埔人」──任何查埔人攏通做爸爸，只有特別的人通成做好的爸爸。......。做品格的典範，互兒女看見你的好行為；良善、謙卑、誠實是爸爸的疼永遠的傳承。聖詩25首「奇妙聖名，至善閣美麗」歌詞中告白咱的上帝是充滿榮耀、聖潔、疼痛的上帝，亦是永活的上帝；是母性上帝、亦是父性上帝；是年老上帝，亦是少年上帝！願咱佇爸爸節閣卡經驗「天父上帝」無比的疼成做每一位爸爸永遠的應允及賜福！