生命的福氣／鄭英兒牧師

詩篇84：1~12

今早起主日禮拜一開始咱吟唱聖詩303首：「主，我欲謳咾祢」，是咱教會信徒真熟的一首聖詩，亦是我真愛吟的一首聖詩。3節的歌詞攏是咱真重要的信仰告白，第1節是盡心盡意的謳咾主，第2節是盡心盡意，真實疼主，第3節是盡心盡意服事主，因為咱欲報揚上帝奇妙大權能，歸榮光上帝聖名；閣咱對上帝已經確實尋著人生的喜樂，哈利路亞。雖然佇聖詩歸類是「普世子民的團契」中教會禮拜的謳咾感謝，總是每一遍吟唱這首聖詩，咱呣那是盡心盡意謳咾感謝上帝「無比的疼痛」及「無盡的恩典」，咱亦閣卡提醒自己怎樣盡心盡意「真實疼主」、「服事上帝」！

頂禮拜三（8月8日）爸爸節下晡佇總會事務所2樓會議室，總會教社委員會舉行「2012日本災後重建義工團」第3梯次的行前訓練會。我受邀請負責分享「國際義工經驗分享」，主要是互義工團的成員，特別是各教會年輕的基督徒，了解「台灣基督長老教會參與國際災難救助經驗」是「疼惜生命、分擔苦難」的信仰見證！這亦是上帝特別賞賜「跨文化、跨族群、跨宗教」的「生命學習之旅」！我分享真多過去自己參與國際災後重建關懷的經驗，佇最後我邀請第3梯次所有的成員做伙吟聖詩303首：「主，我欲謳咾祢」成做共同的祈禱、再次的委身、真實的決志，有真多學員及我仝款佇聖神引導、感動流目屎的過程，深刻體驗信靠上帝的平安及喜樂！

今早起咱做伙研讀詩篇84篇，是有關耶和華上帝殿院的詩篇中，真媠的一篇，詩人通過前往錫安朝聖，渴慕耶和華上帝殿院的心意及信仰課題，閣一遍提醒咱、鼓勵咱通過渴慕、親近、信靠上帝經驗「生命的福氣」：

1. 生命及上帝同在的喜樂
詩篇84：1-4詩人一開始就非常清楚告白：「萬軍的耶和華啊，你徛起的所在怎樣許通意愛！我的心神戀慕耶和華的殿院到昏去；我的心腸，我的肉體向活的上帝求叫。(1-2節)」（現代中文譯本：「上主─萬軍的統帥啊，我多麼愛慕你的居所！我多麼渴慕上主的殿宇！我用整個身心向永生的上帝歡呼歌唱。」）詩人清楚「上帝的殿院」（聖殿或是今日的教會）是上帝徛起的所在，是充滿上帝的權能、疼痛、榮光的所在。詩人充滿期待、歡喜、渴慕欲前往上帝的殿院，甚至渴慕到昏去；詩人整個身心靈（全生命）欲佇上帝的殿院歡喜、謳咾、讚美、感恩！作者的生命經歷，講盡的體驗，佇上帝的殿院，因為及上帝同在，充滿喜樂！所以詩人一遍閣一遍盼望、期待來到上帝的殿院真實見證及上帝同在的喜樂及平安！甚至雀鳥仔及燕仔亦會當佇上帝殿院找到厝及巢，連動物亦會當安穩自在佇上帝的殿院。第4節詩人告白講：「徛起佇你的厝的彼號人有福氣！欲直直謳咾你。」各位兄弟姊妹，當咱今仔日來到義光教會-上帝的殿院，亦是上帝通過耶穌基督十字架救贖做地基所建立的教會，咱是抱什麼心情及態度來親近上帝？咱豈呣是充滿渴慕的心靈來就近上帝？咱是呣是每一遍參加義光教會主日禮拜攏深刻體驗及上帝同在的喜樂及平安？

2. 信心、氣力愈加添的見證：
詩篇84：5-7詩人按呢告白講：「伊的力在佇你，的心意向錫安的大路者，彼號人有福氣！經過「流目屎」的山谷，互伊變做水泉的所在；閣有秋天的雨的福氣給伊蓋滿。愈行，氣力愈加添，逐人到錫安朝見上帝。」（現代中文譯本：「倚靠你獲得力量的人多麼有福啊！他們急切要往錫安山朝聖。他們經過乾旱谷，它就變成泉源地；秋雨沛降，谷中處處池塘。他們越走越有力氣，都要在錫安朝見至尊的上帝。」）詩人親像朝聖者仝款，佇人生及生命邁向上帝的目標的過程，咱必然面對真多的困難、挑戰及考驗！前往耶路撒冷聖殿的路程通常需要經過「別加谷」因為及「流目屎」的希伯來發音相近，真多聖經版本就將「別加谷」譯作「流目屎的山谷」，「別加谷」是沙漠曠旱的所在，總是信靠上帝的緣故，上帝欲將沙漠變成充滿水泉的所在。真正信靠上帝的基督徒，面對人生及生命各種實況及困境，雖然有真多艱難、目屎及困苦，總是上帝是咱的倚靠、幫助及應允，咱愈信靠祂，信心、氣力愈加添，咱的生命必然成做「上帝國的見證」！今早起咱教會少年團契的獻詩-聖詩619首「咱向前行佇上帝的光」（We Are Marching In The Light Of God）是南非祖魯語的聖詩，真活潑、真喜樂、真確定將自己的人生及生命仰望上帝的榮光及引導，就會充滿「上帝國的見證」！1990年9月WSCF（世界學生基督徒聯盟）佇法國巴黎舉行5年1次的大會，當時我受推派擔任大會義工（Steward），佇開會禮拜結束的時，各國的代表唱這首詩歌，對禮拜堂行出來到街路，每人有一條彩色帶（五色代表五大洲），亦分5對一面唱一面振動彩帶，真正感動人的場面，亦真實見證信靠上帝信心、氣力愈加添！包括詩人為國家君王、領袖的祈禱（第8、9節），確信上帝對國家、社會、同胞、人民的眷顧、疼惜、同在及賜福！

3. 敬虔、謙卑信靠上帝的平安：
詩篇84：10-12節詩人的結論告白講：「佇你的殿院住一日，卡好一千日；寧可佇我的上帝的厝顧門，卡好踮佇歹人的布棚。因為耶和華──上帝是日頭，是盾牌，耶和華賞賜恩惠及榮光。伊未曾留一項好物無互許個行正直的人。萬軍的耶和華啊，倚靠你的人有福氣！」（現代中文譯本：「在你的殿宇住一天勝過在別處住千日；我寧願在我上帝的居所看門，不願住在邪惡人的家裏。主上帝是太陽，是保護者；他給我們恩惠、光榮。他從不留下一樣美好的事物不賜給行為正直的人。上主─萬軍的統帥，信靠你的人多麼有福啊！」）敬虔謙卑信靠上帝的人真正有福氣，因為學習生命時刻及上帝同在，閣卡確定、領受、順服上帝的旨意，謙卑、信靠上帝活出誠實、正直、喜樂閣平安的生命見證！

今年4月第57屆總中會 通過制定每年8月第2主日是台灣基督長老教會的「幸福家庭主日」，鼓勵咱眾信徒佇婚姻、家庭、親子的生命學習閣卡信靠上帝的引導及帶領，互咱的人生時刻體驗「生命的福氣」！

感謝咱義光教會長執、信徒做伙參加昨日（8月11日）佇咱教會舉行我的爸爸（鄭連德牧師）及媽媽（陳淑文牧師娘）鑽石婚感恩禮拜。願上帝無比的恩典及賜福及咱每一位兄姊的婚姻、家庭及家族每一位成員同在，引導咱呣那體驗生命的福氣，閣卡決志時刻「榮神益人」！爸爸鄭連德牧師佇2000年做一首詩：「主，請你牽我行」，佇2003年1月24日金婚感恩禮拜發表，願這首詩成做咱信仰共同的勉勵：「人生的道路有快樂歡喜，總是也遇到艱苦的滋味，伸你的聖手互我無驚惶，救主，請你牽我同行。倚靠我主，內心平安，你是我一生向望。」