堅心跟隨主／鄭英兒牧師

歌羅西1：15-23

2012.04.15

頂禮拜日是今年度的復活節，亦是咱教會30歲生日「大歡喜閣感恩」的日子。感謝咱姊妹教會韓國新堂中央教會10人代表團及咱做伙歡喜並彼此鼓勵繼續為著上帝國的廣闊認真打拼！佇復活節的主日禮拜，感謝鄭永泰牧師勉勵咱眾兄姊重新確信「復活節的意義」，再次告白耶穌為著咱受釘死十字架，為著咱的稱義對死亡中復活，咱每一位基督徒已經得著永遠活的生命以及復活的盼望！復活節的主日禮拜互咱參加的眾兄姊真受感動有2項：第一就是咱及林文珠姊妹、張桂碧姊妹接受洗禮成做基督徒的大歡喜相及有份，2位參與咱教會的禮拜及教會生活已經真多年，通過簡淑香長老全家及咱眾長執、兄姊的關心、分享及鼓勵，2人自己清楚、確信上帝通過耶穌基督「道成肉體」賞賜互的救贖及恩典，佇義光教會30歲的生日，亦成做2人人生及生命「重頭生」的「生日」！咱有真多兄姊及2人佇洗禮成做基督徒的時做伙流落「感恩及喜樂的目屎」！第二是咱看見新堂中央教會的長執、兄姊用咱台灣話唱出聖詩132首「耶穌疼我，我知明」，的用心及打拼，對咱義光教會的支持及鼓勵，甚至努力學習咱的父母話-台灣話吟詩謳咾上帝，見證上帝沒盡的疼痛！

4月8日下埔2點半咱教會舉行「設教30周年感恩禮拜」，真感謝高俊明牧師的證道：「真理的得勝」，互咱閣卡確信：（1）十字架的真理（2）復活的真理（3）基督徒的責任及使命。高牧師艱苦心流目屎回顧林義雄律師的母親林游阿妹女士及雙胞胎查某子亮均、亭均3人殘忍受刣死的慘景。但是高牧師深信根基佇十字架及復活的真理，咱基督徒的使命及責任一定必然通過信仰的見證告白真理的得勝互國家、社會及人民得著「生命盼望的記號」！特別感謝新堂中央教會贈送咱教會的禮物--「十字架」及「以馬內利」的字畫，時刻鼓勵、祝福咱教會沒記「耶穌基督的救贖」以及「上帝時刻的同在」是咱義光教會的根基！

今早起咱研讀歌羅西1：15-23，互咱通過保羅的提醒及勉勵做伙學習「盡心跟隨主」的信仰課題：

1. 耶穌基督的定位、成就及作為：

歌羅西教會並呣是保羅親自建立的教會，根據歷史及聖經學家的研究，主後53-56年保羅第3次傳道旅行來到亞細亞的以弗所（現今土其耳的西部），佇3年多的傳道過程，對附近萊克斯河谷來的人聽到基督福音，接受耶穌基督的救恩，然後轉去以後漸漸佇河谷內面3個城市建立老底嘉、希拉波立及歌羅西3間教會（參考使徒行傳18、19章）。這3間教會有一部份的猶太人，亦有大部份的當地人，成做初信的基督徒，有傳福音的熱心，但是卻沒建立正確的「基督信仰」。保羅佇主後61-62年佇羅馬的監獄寫這個書信，請推基古及阿尼西謀2人送到歌羅西教會。當時歌羅西教會內因為「諾斯底主義」異端的影響，認為人的肉體是邪惡的，否定耶穌真正成做人「道成肉體」的事實，並形成2種極端的行為；一種是要求基督徒通過嚴格的「苦修、苦行主義」來否定肉體，另外一種是顛倒完全放縱自己的肉體，沒任何約束及限制。歌羅西教會的基督徒亦強調占星術、鬼神學、禮儀、割禮、天使崇拜...等，基督徒的信仰面對多多的困擾、阻擋及挑戰。保羅疼惜每一間教會及每一位基督徒，面對歌羅西教會的困境，保羅通過書信確信耶穌基督的身分、成就及作為，並鼓勵基督徒活出「佇基督內面的新生命」！歌羅西1：15~20，現代台語譯本：「基督及祂的工作」，紅皮漢羅聖經的標題：「基督是一切受造物的頭」，巴克禮台語漢羅版本標題：「基督的位格及工作」。保羅分2部分說明耶穌基督的身分、成就及作為：

(1)基督及萬物(15~17節):

A. 基督是上帝的形象：15節保羅告白「基督是看著的上帝的形像；祂是大子，比一切受造的卡早有。」

B. 基督比世間受造的萬物卡重要：16節保羅清楚講明：「因為上帝通過祂來創造萬有，就是佇天頂及地上，看會到的及看著的，靈界坐王位的及主政者、統領者及掌權者，上帝通過祂，亦為著祂，創造萬有。」

C. 宇宙萬物是上帝及基督做伙創造（16節）。

D. 宇宙萬物佇基督內面成做一體：18節保羅講：「猶未有萬有以前祂就存在，萬有靠祂連結好勢。」

(2)基督及教會(18~20節):

A. 基督是教會的頭：18節a保羅告白：「祂是教會，就是祂的身軀的頭。」

B. 基督是第一位贏過死亡的見證者：18節b保羅告白：「祂是原始、是大子，上帝互祂成做頭一個對死人中復活的，通佇萬有中成做第一。」

C. 上帝將自己的豐盛及特質充滿佇基督：19節保羅講：「因為上帝照自己的旨意，將自己完整的特性充滿佇祂內面。」

D. 基督通過十字架的犧牲及死亡互宇宙萬物及上帝恢復和好的關係：20節保羅分享：「通過祂的子，上帝互萬有，沒論佇天頂抑是地上，攏及祂和好；上帝通過祂的子佇十字架頂流血死來促成和平。」

保羅分享、闡明基督的身分、定位、成就及作為，其實是為著拯救全人類，咱是呣是再次確信閣告白？

2. 堅心跟隨主成做福音的差用：

保羅明確、清楚、具體說明基督的身分及作為以後，就繼續提醒歌羅西教會的信徒努力信仰的實踐。保羅先佇西1：21~22按呢講：「恁咧，恁有一時及上帝斷絕關係，心思及祂敵對，做壞代誌。呣久現在，上帝已經通過自己的子肉體的死，互恁及祂和好，成做聖潔，沒缺點，沒通嫌的祭物獻佇祂面前。」保羅明白指出歌羅亞教會的基督徒，因為沒正確的信仰，致到及上帝斷絕關係，離開上帝，所行所做呣那違背上帝旨意，亦沒法度體驗基督救恩賞賜的平安及喜樂。總是保羅告白上帝的疼時刻邀請咱反悔重新回歸祂，上帝通過耶穌基督十字架的犧牲、死亡及復活，賞賜人類「永遠的救恩及疼痛」！上帝歡迎咱軟弱、有限時常違背祂旨意的人，隨時攏通信靠基督十字架的救恩得著上帝的疼痛及恩典！

所以西1：23保羅佇「救恩的確信」中非常明確分享、見證自己的信仰告白並勉勵歌羅西教會及每一時代的基督徒按呢講：「恁著堅持信仰，堅固徛在，互恁聽到福音的時所得著的盼望沒搖動，這個福音已經傳互天下眾生，我-保羅就是這個福音的差用。」紅皮漢羅版23節：「恁當然著繼續互恁的信仰穩定、堅固，呣通互恁聽著福音所得著的希望來動搖。這個福音已經宣揚互天下每一個人啦──我保羅，也是為著這個福音來啲做奴僕。」

保羅勉勵咱基督徒攏應該親像他仝款，堅心跟隨主成做基督福音的差用及奴僕！咱義光教會佇上帝沒盡的疼痛及恩典已經設立30周年，咱每一位兄姊、信徒時常互咱提醒-著盡力通過咱的生命及見證成做「基督福音的勇士」，亦打拼佇咱的關懷、受苦、犧牲、疼痛的生命實踐廣闊上帝的公義互人人的生命得著盼望及祝福，這是咱「義光人」時時刻刻的使命及責任！

讚美--至好朋友就是耶穌

至好朋友就是耶穌，擔當罪過及煩惱，真正咱有大大福氣　萬事攏通對祂討；心肝常常失落平安，沓沓掛慮艱苦事，這是對咱未有深信，未有放心交託主。

本週金句~歌羅西1：23

nā lin tn̂g-tn̂g tiam-tī sin, ū toē-ki koh kian-ko͘, bo siū io-tāng, lai lī-khui hok-im e ǹg-bāng, che hok-im chiū-sī lin so͘ bat thiaⁿ-kiⁿ e, koh sī thoan tī thiⁿ-ē long-chong siū chhong-chō e e tiong-kan; goa Po-lo i-keng siat-li̍p choe i e chhe-ēng.

你們必須持守信仰，堅立在鞏固的基礎上；不要放棄當初領受福音時所得到的盼望。現在，這福音已經傳遍了全世界；我─保羅就是這福音的僕人。