訂閱
上一篇
返回
下一篇
上帝的恩典／鄭英兒牧師
作者: gikong 日期: 2012-07-29 22:25
自2011年開始，咱教會將每一個第5主日稱做「特別主日」，期待互咱教會兄姊有機會通過「特別主日」關心總會、中區會或地方教會的「特別事工」。今年前2次特別主日，咱有機會關心支持「太魯閣中會」以及總會青年事工的「搖滾主耶穌」。今日是今年第3次「特別主日」，咱通了解張再凱長老、游惠茹校長長期參與、支持的「社團法人苗栗縣愛加倍社區關懷協會」--尤其咱看見關懷的新移民（嫁來台灣的外籍配偶）以及社區弱勢家庭兒童，佇的詩歌及表演的過程，咱欲深深體會亦感受「上帝的恩典」佇身上所帶來「生命的盼望及奇妙的改變」！
今早起咱做伙恭讀路加福音4：18-19是一段非常重要閣真特別的記載，四福音中間只有路加福音描寫耶穌人生第一次轉去故鄉拿撒勒「公開」、「正式」的「宣講」！耶穌經過佇曠野40日試探「及格」以後，耶穌開始佇加利利地區開始傳道理，特別他亦就近轉去自己大傼的所在拿撒勒，耶穌照習慣佇安息日前往會堂，當他徛起來欲讀聖經的時陣，有人將一卷先知以賽亞的冊提互耶穌，耶穌就翻開以賽亞書61章1-2節，就宣讀這段記載，就是今早起咱做伙恭讀路加4：18-19，咱通佇耶穌「宣讀」以賽亞書61章1-2節來學習領受「上帝的恩典」，這是耶穌公開宣告「上帝國的真理」！
1. 基督信仰是散赤人（貧窮人）及社會邊緣人的好消息：
路加4章18節上半段現代台語譯本耶穌宣告講：「主的神臨到我，因為祂用油抹我，互我傳好消息互散赤人。」（紅皮漢羅版：「主賞賜伊的聖靈互我，主用油給我抹，互我通對散赤人傳福音。現代中文譯本：「主的靈臨到我，揀選我，要我向貧窮人傳福音。」）耶穌領受上帝賞賜的聖神成做伊的安慰、幫助及氣力，閣通過上帝用油抹耶穌，揀選伊，膏立伊成做上帝國真理的宣揚者及分享者。總是上重要是耶穌傳講的對象及內容是什麼？耶穌親嘴講出伊欲宣揚好消息互散赤人（貧窮人），雖然耶穌是借用先知以賽亞的預言，但是耶穌自己通過伊「道成肉體」的生命向全世界人類，特別是散赤人、喪鄉人、貧窮人及社會邊緣人分享「好消息」──「上帝的救贖及恩典」！因為散赤人及社會邊緣人是社會中上弱勢、受看輕、受排斥、上艱苦的生命，是上帝創造、疼惜閣關懷的生命，耶穌道成肉體的救恩及相及有份，耶穌對分享這個上帝的恩典的「好消息」！
路加4：19耶穌繼續宣講：「宣佈主恩惠的年」。（紅皮漢羅版：「宣佈主施恩的年」。現代中文譯本：「並宣告主拯救祂子民的恩年」。）耶穌引用舊約「禧年」的觀念宣佈一切負債攏免除，奴隸受釋放得自由（利未記25章），這確確實實是「散赤人的好消息及福音」，因為這是上帝賞賜的恩典及疼痛！
2. 耶穌基督帶來「解放自由的福音」以及「生命的盼望」：
路加4章18節下半段現代台語譯本耶穌講：「祂差我宣佈：受掠的著釋放，沒看見的閣看見，受壓迫的得著自由。」（現代中文譯本：「祂差我宣告：被擄的，得釋放；瞎眼的，得光明；受欺壓的，得自由。」）耶穌引用先知以賽亞的預言，說明未來上帝賞賜一位「彌賽亞」（救世主）互世界人類，祂欲賞賜人類解放自由的福音，因為祂欲受掠佇監獄中的人得著自由！耶穌欲成就「人類救世主」的使命及責任！但是耶穌呣是親像世界的君王仝款通過軍事、武器、戰爭傷害生命的方式得到權位；耶穌顛倒是採取「犧牲自己的生命」擔當世界人類一切的罪惡及過失受釘十字架，總是耶穌死後3日復活贏過死亡的權勢。互所有相信、接待的人及耶穌「同死同復活」！這就是上帝賞賜全人類「釋放、自由的福音」，咱人類（沒論任何情境、身分）只要願意相信、接納耶穌基督佇十字架完成的「人類普世救恩」，咱呣那得著釋放及自由，咱亦會經驗「生命的盼望」！
馬可10：45耶穌親嘴宣告祂的「生命觀」講：「因為人子來呣是欲互人服事，反轉是欲給人服事，甚至犧牲自己的生命來贖回真多人。」今日咱已經相信接納耶穌基督的救恩，亦深深體驗「上帝的恩典」，咱著學習分享、見證「上帝的恩典、平安及喜樂」，親像愛加倍關懷協會的努力、打拼的事工，互真多人因為基督信仰時刻見證「生命的盼望」！
