生命的盼望

佇禮拜日主日禮拜咱通過馬可4：35~41做伙學習「風湧中的信心」，一方面咱重新確信耶穌基督時刻及咱做伙同擔生命的苦難，另一方面咱閣卡決志佇咱基督徒人生及生命信靠上帝，盡忠服事，榮神益人。這禮拜的耕心週刊第826期主題是：「咱需要燈塔」──咱的人生必然面對非常多的風湧，總是當咱看見閣仰望佇石磐頂的燈塔，咱就會體驗生命的盼望。耶穌基督就是咱人生的燈塔時刻提供生命的盼望！這期「耕心週刊」分享3篇真好的信仰見證：（1）風浪中得平安──風湧中肉體苦難，顛倒體驗上帝的疼痛及拯救，雖然是慕道友，總是生命經歷確信倚靠上帝必然得到風湧中的平安。（2）唯一的倖存者：今年3月26日空軍海鷗部隊救援任務佇蘭嶼海面失事，直升機沉落海底，唯一生還者蔡宜哲兄弟的生命見證。（3）幸福就在你身邊：傳統基督教家庭，佇家庭成員的死失及病痛，特別是自己的丈夫46歲胰臟癌安息，上帝引導3位千金大傼，目前時刻感受3位查某子的孝順，這是上帝的疼痛佇咱人生大小風湧中的應允及賜福。

今早起咱做伙研讀馬可5：21~43，咱欲看見亦深刻體驗耶穌基督怎樣成做「受苦生命」的「拯救及盼望」！尤其耶穌是拯救2位「女性」的生命，一位血漏12年苦痛的婦女，一位是12歲年輕的查某囝仔；耶穌基督通過拯救的過程，提醒咱「信心及生命盼望」的課題：

1. 信心的行動，真實體驗生命的盼望：
馬可5：21~43現代台語譯本標題：「會堂主管的查某子及得著血漏病的婦仁人」，基本上是耶穌面對2個「生命事件」的記載，總是耶穌攏提醒「信心」的課題及「生命」的關係。主要是會堂的主管 Iàp-ló來到耶穌面前仆佇耶穌腳前，懇求講：「我的小傼查某子啲欲死啊，請祢來給她按手，給她醫好，互伊會活。」耶穌面對老父為著查某子懇求祂的醫治，耶穌就答應前往會堂主管的厝，閣有一大陣人及耶穌做伙去。

馬可5：25~34記載耶穌及一大陣人前往Iàp-ló的厝半路中所發生的代誌。有一位得著血漏病12年的婦仁人，看過真多醫生，受真多痛苦，錢亦攏開了了，但是血漏病呣那沒卡好，顛倒那傷重。他聽著耶穌的代誌，就擠入去群眾內面，倚近佇耶穌的後面，摸耶穌的衫，因為她想講：「我干單摸著伊的衫，病就會好。」這個血漏病的婦仁人摸耶穌的衫以後，她的血漏隨時止，感覺身軀的病已經好。代誌本來佇遮就已經有完滿的結局！

30節記載耶穌隨時知有氣力對伊出去，就越轉身問群眾：「什麼人摸我的衫？」耶穌的門徒呣知事實，沒了解亦沒清楚耶穌的心意，顛倒叫耶穌呣免閣問。但是耶穌雖然啲趕路閣趕時間前往Iàp-ló的厝，耶穌猶原堅持欲找摸伊衫的人。那位血漏病得醫好的婦仁人非常驚惶中間跪佇耶穌腳前承認她所做一切！耶穌並沒責備她，反轉安慰閣鼓勵她講：「妳的信心互你好去啦，平安倒去，妳的病已經好啊！」原來只有這位婦仁人自己體驗「病痛得醫治，生命得盼望」的信仰見證，耶穌卻公開佇群眾的面前謳咾她、鼓勵她、肯定她「信心的行動」，因為按呢她真實體驗耶穌基督是她生命的盼望！

佇當時以色列社會婦女沒地位閣沒受尊重的實況，何況這位互血漏病折磨12年致到苦痛到極的婦仁人，她是「弱勢中的弱勢」亦是社會邊緣人中沒人關心最苦痛的一群人。耶穌一方面為著喚醒以色列社會對「受苦生命」的關懷，特別致意表揚這個血漏病的婦仁人「信心的行動」，另外一方面宣示世界人類每一個人攏通接受「上帝的疼痛及救恩」，沒論任何卑賤、軟弱、喪鄉、困苦的人攏通憑「信心」接受上的國的疼痛！

2. 信心的操練，時刻見證生命的盼望：
馬可5：35~36記載耶穌猶啲對那位血漏病得醫治的婦仁人講話的時，有人對會堂主管的厝來，對Iàp-ló講：「妳的查某子已經死去，那著閣勞煩老師。」耶穌沒給聽，對Iàp-ló講：「呣免驚，你只有信！」咱通想像Iàp-ló聽到查某子已經死去的消息，他心內的艱苦，可能亦有對耶穌的不滿，總是這是耶穌互伊「信心的操練」！後來耶穌就導3位主要的門徒彼得、雅各及約翰做伙前往Iàp-ló的厝，看到場面真亂，面對查某囝仔的死亡，有人哮，有人大聲哭。耶穌入去厝內，對講：「恁那哭kah亂操操？（紅皮漢羅版：哭kah chiàh悲慘？）這個囝仔沒死，是啲睏。」

Iàp-ló厝內的人恥笑耶穌所講的話，耶穌就將攏趕出去，然後導囝仔的父母及3個門徒入去囝仔的房間，耶穌牽查某囝仔的手，對她講：「大利大，古未」亞蘭語意思是：「查某囝仔，我給妳講，起來！」查某囝仔隨時起來行，在場的人攏非常著驚。
耶穌的權能贏過死亡，祂互làp-ló的查某子對死亡中復活起來，四福音書另外記載耶穌亦有2遍互死人復活：路加7：11-17拿因城寡婦的獨生子，約翰11：38-44拉撒路。總是耶穌贏過死亡的權柄，是欲等待耶穌基督自己對死復活以後才欲公開互人類世界，所以馬可5：43耶穌嚴嚴警戒佇làp-ló厝內的人呣通將查某囝仔對死復活的事互外人知。

耶穌互làp-ló 12歲查某子對死復活的神蹟，對làp-ló本人以及他的親族，閣包括耶穌的門徒，耶穌是啲訓練、培育、造就「信心的操練」！雖然佇這些過程，咱深刻體驗會堂主管làp-ló（身為老父疼惜查某子的病痛，期待耶稣醫治迫切的心情）以及他的親族怎樣恥笑耶穌，沒相信耶穌所講的話。耶穌的門徒，面對血漏病12年的婦仁人因為信心的行動得到耶穌的肯定、謳咾及鼓勵，門徒自己有得到什麼信仰的檢討及學習？彼得、雅各、約翰3位耶穌上重要、上看重的門徒，佇耶穌行神蹟互12歲的查某囝仔對死復活的「生命見證」中間，「信心的操練」得到偌多造就及成長？耶穌基督引導、帶領咱基督徒，親像làp-ló及12個門徒通過多多「信心的操練」互咱時刻見證生命的盼望！

7月2日-6日咱義光教會少年團契及新店教會做伙佇銅鑼國小舉辦「暑假夏令營」--主題「就是讚」！咱教會有8位兄姐及少年團契佇今日下就出發前往，共同參與這個真有意義的「暑期兒童夏令營」，請兄姊關心代禱，感謝上帝互咱教會少年團契參與這個事工，懇求上帝賞賜閣卡大的信心、疼心、智慧及能力，互愈服事愈甘甜，亦互銅鑼國小參加的每一位小朋友，因為經驗上帝疼痛及恩典，真實得到「生命的盼望」！