風湧中的信心

馬可4：35-41
鄭英兒牧師
2012.06.24

6月20日（禮拜三）上午10點，咱台灣基督長老教會主辦，教會與社會委員會承辦的「全民抗漲」運動台北區佇濟南教會辦公室前鐵棚下舉行結束禮拜。因為中央氣象局已經發佈「泰利風颱」的海上及陸上風颱警報，前一日（6月19日）暗時台北中會教社部員輪值時段，為避免總會教社委員會的帳篷閣一遍損失（前一禮拜的6月11日因為風真大，其中一個帳篷鐵枝折斷損壞），就先將帳篷先收起來閣整理好。結束禮拜由台北、七星及西美3中會教社部同工20多人做伙參與，充滿感恩的心感謝上帝31日來的引導及帶領，互台北區的「全民抗漲」靜坐活動是全台唯一個5月21日開始全程堅持到底直到20日結束的地點。中南部地區因為612水災的考量，大多數攏啲6月17日（泰利風颱前）下舉行結束感恩禮拜或遊行。這期第3147期台灣教會公報第2版特別報導台北區、台中區及屏東區「全民抗漲」活動的實況，尤其南部地區原住民各族群面對612水災的災情暫時離開家園安置收容佇南部的軍營營區，但是眾牧長、信徒閣卡通過的信仰學習來見證「風湧中的信心」！咱台灣基督長老教會這次推動「全民抗漲」的信仰課題，雖然佇短期間宣傳呣是真好，但是通過全台各中區會教社部積極組織、動員的結果，雖然沒達到12個地區攏推動一個月的活動，但是至少有6地區（台北、台中、彰化、台南、高雄、屏東）結連牧者、信徒通過咱生命學習「及人民共同分擔苦難」的過程，佇台灣整體國家、社會、面對多多困難及挑戰的時刻，咱全體教會真實閣謙卑努力「風湧中的信心」的信仰見證！

今早起咱做伙研讀馬可4：35-41，這是今日每日新眼光讀經的經節，通過耶穌及12個門徒所經歷的「信仰考驗及操練」互咱閣卡認真學習「風湧中的信心」的信仰課題！

1. 耶穌基督及咱做伙同擔生命的苦難
馬可4：35-41的記載佇馬太8：23-27以及路加8：22-25亦攏有記載，總是馬可福音的記載卡詳細亦互咱閣卡了解耶穌提醒的信仰課題。馬可4：35-38按呢記載：彼日天暗的時，耶穌對門徒講：「咱過去彼岸。」門徒就離開群眾上船，及已經佇船頂的耶穌做伙去，有幾若隻船嘛做伙去。忽然起大風，湧撥入船內，致到船互水淹到欲滿。耶穌佇船尾khòa枕頭啲睏；門徒給他叫醒，講：「老師，阮啲欲無命囉，你沒要緊哦？」對這段記載咱看見幾項事實及現況：

（1） 耶穌及12門徒暗時坐船欲過加利利海前往對岸
（2） 佇加利利海的時起大風，湧潑入船內，海水淹船非常嚴重亦非常危險，通講這隻船面臨「沉船的大危機」。
（3） 雖然大風大湧船啲欲沉，耶穌真安穩佇船尾啲睏。
（4） 門徒佇驚惶中間，叫醒耶穌，將面臨危機內心的困境以及對耶穌的不滿攏同時表達出來，沒法度體會亦呣敢確信耶穌基督及同在的平安。

門徒面對大風湧，船啲欲沉的危機，想到自己面臨「生命危機」，雖然門徒中間有至少4位是經驗豐富的「討魚人」，過去佇加利利海討魚的經驗必然時常面對此種大風湧，總是佇這個重要關鍵時刻，猶原佇人的軟弱及本性呣知欲怎樣脫離「現時的危機」。耶穌成做12門徒的老師，耶穌疼惜、關心、照顧、培育、訓練、造就將來欲成做──「上帝國的福音精兵」！通過各種的方式，包括面對困難及危機的試煉，耶穌引導閣陪伴做伙面對「生命的挑戰」，耶穌及12門徒每日做伙生活，做伙面對告種質疑、問題、指責、批判，甚至陷害及生命的傷害；耶穌「教育」12門徒互清楚經驗──耶穌及做伙同擔生命的一切經歷，特別是生命的困境及苦難！這是耶穌及門徒同在上重要的應允及賜福，但是門徒以及真多基督徒時常佇人生及生命關鍵或危機時刻，將至好朋友「耶穌」記得，或是將「耶穌」放佇隱密的「倉庫」或「冰庫」，然後才講：「祢沒要緊阮的艱苦嗎？」

2. 信靠上帝，盡忠服事，榮神益人：
馬可4：39~40現代台語譯本記載：耶穌起來，責備風，閣命令湧，講：「靜落去！定落來！」風恬去，湖就靜靜靜。耶穌對門徒講：「恁哪許呢驚？恁猶沒信心是沒？」（紅皮漢羅聖經40節按呢記載：耶穌就對門徒講：「恁哪會這呢無膽？恁猶久無信心是無？」）馬可4：39的記載是「驚天動地」的畫面，耶穌展現上帝的權能，佇大風湧、大暴風造成船啲欲沉的現況，竟然佇耶穌講：「靜落去！定落來！」的命令以後，風湧就恬落去，加利利湖就靜靜靜。這是偌呢「驚人」的情境，上帝沒比的權能通過耶穌基督閣一遍互耶穌的門徒以及在場佇船頂所有的人親身經驗！所以馬可4：41記載講：非常驚惶，講來講去：「這個是什麼人，連風及湧to順服！」

馬可4：35~41佇現代台語譯本的標題：「耶穌平靜風湧」；紅皮漢羅版的標題：耶穌鎮壓風湧」；台語漢羅版的標題：「平靜風及海」。雖然沒仝款的版本有沒仝款的標題，但是攏清楚、具體、明白指出上帝是創造宇宙萬物及人類的上帝，祂有超越人類想像的權威及能力，宇宙一切萬物攏必須要順服佇祂的權柄，包括大自然的秩序及災害（地震、風颱、海嘯、暴風雨......）。耶穌平靜風雨的神蹟，閣一遍要求、提醒12門徒「信心的功課」──呣通佇四面危機的實況靠自己的力量去面對，著信靠上帝，勇敢成做「上帝國盡忠的福音戰士」，互上帝國佇世界日日廣闊。

耶穌及12個門徒共同面臨「生死存亡的生命危機」，耶穌呣那再次互門徒確信祂時刻及同在並同擔一切生命經歷；耶穌閣卡進一步通過平靜風湧的神蹟勉勵門徒應該確實信靠上帝，盡忠服事，沒論面對偌大的困難、挑戰及危機，耶穌基督特別鼓勵咱每一位基督徒（跟隨耶穌基督的門徒）著真真正正、實實在在信靠上帝、盡忠服事、榮神益人！

這次總會發起「全民抗漲」活動及台灣人民同擔苦難，3大訴求其中1項是「禁止含瘦肉精的食品」；感謝立法院在野黨（特別是民進黨）長期抗戰120小時阻擋「美國瘦肉精食品」佇正常會期修法通過進口。原來執政的國民黨政府期待6月20日召開臨時會通過「美國瘦肉精食品進口」，總是因為「泰利風颱」經過台灣，臨時會呣敢召開。上帝疼痛咱台灣全體人民，看見閣清楚南台灣612水災的災害，雖然泰利風颱過境，但是沒增加台灣人民水災的壓力，顛倒互全台每一個水庫水量滿滿。立法院臨時會沒召開，台灣人民呣免馬上面對「美國瘦肉精食品」帶來健康及安全的威脅，這豈呣是上帝對咱整體教會「全民抗漲」信仰課題的回應！這豈呣是上帝賞賜互咱「風湧中的信心」的真實見證！