堅持疼的實踐－鄭英兒牧師

每年4月第四主日是台北及七星兩中會共同制定的「北區大專事工紀念主日」，通過北部兩中會眾教會牧長、信徒共同支持「台北大專學生中心」所推動大專福音事工，亦做伙為大台北地區真多「大專長青團契」的大專生關心、代禱。願上帝引導亻因因為基督信仰，一生打拚努力成做上帝歡喜的兒女，亦盡力活出「基督門徒」的見證！台灣基督長老教會大專事工真重要的目標就是根據路加福音二章52節：「耶穌的智慧及年歲愈加添；上帝及人嘛愈疼伊。」通過大專事工咱努力培育、造就一方面佇年歲及專業知識愈增加的大專學生，閣卡重要的是亻因佇一生影響上大的宗教信仰會愈確信、愈堅定、愈實踐佇每日生活中間。通過大專基督徒信仰及生活的結連，生命關懷及行動，真實將上帝賞賜人類的恩典、疼痛、平安、喜樂帶到社會、國家及世界！

今年的「北區大專事工紀念主日」，台北大專學生中心推派我前往松山教會(4月27日)及咱義光教會(5月4日)請安及募款。頂禮拜日(4月27日)對咱教會是真特別的主日禮拜，為著反核四興建的林義雄先生佇咱義光教會禁食，他亦特別參加咱的主日禮拜，互咱全體信徒閣卡體會「同担苦難」的信仰見證。今日主日禮拜咱亦有一群特別來賓佇咱中間做伙禮拜，這12位TIM(Training in Mission)的學生及咱同敬拜上帝亦來了解咱義光教會的信仰見證。世界傳道會(Council for World Mission 簡稱CWM)佇全世界有31個會員教會，咱台灣基督長老教會亦是亻因的會員教會，TIM是每年世界傳道會真重要的事工，邀請會員教會代表前往兩個沒仝國家的會員教會了解、學習亻因的教會現況及信仰見證，今年(2014年)CWM第一遍佇咱台灣舉行TIM事工(3月-7月底)，3月12日早起佇台南神學院我有機會為亻因介紹台灣基督長老教會的現況、組織、體制、簡單歷史......)，其中亦有介紹義光教會，真歡迎亻因12位今仔日來到咱中間，咱眾兄姊亦有機會認識亻因12個沒仝款的國家及教會的見證(包括非洲的馬達加斯加、馬拉威、尚比亞，南太平洋的薩摩亞、吉里巴斯，亞洲的印度、孟加拉及韓國......)，願上帝引導咱通過普世教會合一的見證來閣卡廣闊上帝國。

今早起咱研讀馬可福音12：28-34，現代台語譯本的標題：「第一重要的誡命」。四福音書類似的記載佇馬太22:34-40，標題：「上大的誡命」，背景是法利賽人欲試探閣陷害耶穌的動機下，質問耶穌有關摩西的律法叨一條是上帝的誡命？」另外佇路加福音10:25-28，29-37，標題：「什麼人是好厝邊」，耶穌仝款面對律法教師的試探及問題：「老師，我著做什麼才會得著永遠的活命？」耶穌問他律法的規定，他攏清楚應答，耶穌期待他照按呢去做就會得著活命。總是這個律法教師為著表明自己是著，就繼續問耶穌：「什麼人是我的厝邊？」耶穌就講出好撒瑪利亞人的比喻，並問這個律法教師，什麼人是別人(特別是受苦的人)的好厝邊？這個律法教師講：「給伊憐憫的人。」耶穌最後命令這位律法教師講：「你去，照按呢去做！」當咱看馬可12:28-34，咱對兩方面學習咱的信仰課題：

1. 基督徒人生第一重要的是──「疼的誡命」：
馬可福音12:28-31記載：有一個經學教師來，聽著耶穌及撒督該派的人啲辯論，看耶穌應了真著，就問伊：「所有的誡命中，叨一條第一重要？」耶穌就引用申命記6:4-5，佇29-31節應講(這是馬太、馬可、路加3本福音書上清楚、上詳細的記載)：「第一是：以色列啊，恁著聽！主──咱的上帝是獨一的主。你著全心、全情、全意、全力疼主你的上帝。第二是：著疼厝邊親像疼家己。無別的誡命比諸個閣較重要」。對照申命記6:4-5，耶穌呣那增加一項「全意」(或是「盡意」疼主──你的上帝，閣加上：「第二：著疼厝邊親像疼家己。無別的誡命比諸個閣較重要。耶穌明確指出基督徒上重要亦是第一重要的誡命就是「疼的誡命」！疼上帝閣疼人，並且是全心、全情、全意、全力疼上帝閣疼人是咱做基督的門徒一生的使命及責任！台語的「疼」及「愛」有真大的沒仝款，這也是台灣的娞，「疼」是親像希臘語「Agape」有犧牲、受苦、付出代價的行為，呣是只有意愛、歡喜的意思。「疼」亦是耶穌基督甘願犧牲自己生命受釘死十字架賞賜全人類的「救贖及恩典」！「疼」亦是每年母親節咱感恩、紀念母親懷胎、受苦、疼惜、犧牲、關懷生命的見證。

耶穌佇馬太福音25:31-46通過「最後的審判」的比喻來說明「疼的誡命」的重要，40節上主講：「我實在給恁講，恁有按呢對待我兄弟姊妹上微細的的一個，就是好款待我。」

2. 咱著全生命堅持疼的實踐：
馬可12：32-33記載這個經學教師聽著耶穌講明第一重要──「疼的誡命」以後，伊對耶穌講：「老師，你說講的真著。你講上帝只有一位，伊以外無別個；閣講著用全心，全智，全力疼上帝，閣疼厝邊親像疼家己是比獻攏總的燒化祭及祭物閣較要緊。」這個經學教師引用申命祭6:4-5卻將「全情」(盡情)改為「全智」(盡智)，然後伊閣加上一句話：「疼上帝閣疼厝邊是比獻攏總的燒化祭及祭物閣較要緊。」這位經學教師的話及顯明先知彌迦佇彌迦書6:6-8提醒──「上帝的要求」仝款講：「我就近耶和華，跪拜至高的上帝，著用甚麼啊？著用燒祭抑是滿年的牛仔來就近伊啊？耶和華歡喜千千隻的公羊嗎？抑是萬萬條溪的油嗎？我著為家己的罪過獻我的大子嗎？為著我心內的罪惡獻我本身所生的嗎？人啊，伊曾指示你甚麼是好。耶和華愛你甚麼？獨獨愛你行公義，心存憐憫，謙卑及你的上帝相及行。」無論咱怎樣虔誠、熱情、致意佇讀經、靈修、祈禱、禮拜，甚至咱努力、盡力奉獻金錢、時間、精神、打拚服事。上帝對咱真正的期待及要求並呣是按呢！上帝對咱基督門徒具體的盼望是──堅持疼的實踐，閣卡清楚明確上帝的命令是──用咱的生命，謙卑委身信靠上帝，堅持疼人疼生命的實踐！今年3月18日-4月10日台灣的大專生佔領立法院帶動「太陽花學運」，面對立法院議事程序不正義，亻因要求「捍衛民主，退回服貿」，面對台灣國家的危機，台灣人民及社會的苦難，大專學生踏出校園，用生命及行動實踐「公民運動」。咱台北大專學生中心的工作者及大台北地區長青團契的大專生對佔領立法院開始，直到4月10日離開立法院為止，攏共同參與做伙。親像1990年3月的「野百合學運」仝款，台灣基督長老教會各地區的大專基督徒以及台神、南神、玉神的神學生攏共同參與台灣歷史重要的「公民運動」。亻因呣那通過自己的生命及行動結連台灣國家的命運，亻因亦通過犧牲及受苦堅持疼的實踐，亻因閣卡是咱台灣基督長老教會信仰告白中「教會觀」──釘根佇本地，認同所有的住民，通過疼祭受苦，成做盼望的記號──真真正正的見證者！

4月22日-28日林義雄先生佇咱義光教會禁食、禁語反核四的「生命行動」互咱教會32年的「信仰見證」閣卡得著整個台灣社會及人民、鄉親的關心；亦再次提醒咱教會牧長、信徒及兄姊為著台灣的公義及平安時刻沒停止的責任及使命！請咱繼續為著義雄兄的身心靈迫切代禱，願上帝的恩典、疼痛時刻及他以及全家族同在！對林義雄先生用生命堅持對台灣國疼的實踐，互我閣卡思念1991年5月8日仝款用生命堅持疼的實踐安息主懷的施俊哲兄弟，他一生24年閣7個月生命及信仰的見證佇「天堂鳥的故事」有真多牧長、兄姊成做見證者。這亦是今日咱做伙繼續關心、支持大專事工，為大專事工推動經費奉獻的動力。咱欲盡力共同培育閣卡多「基督的門徒」，亦是一生用全生命堅持疼的實踐的基督徒！當咱每一位基督門徒攏全生命堅持疼的實踐，咱就會得到上帝的應允，親像馬可12:34耶穌對這位經學教師講：「你離上帝國無遠！」