訂閱
上一篇
返回
下一篇
活命的米糧（4）
作者: gikong 日期: 2012-03-04 20:58
鄭英兒牧師
2012.03.04
2月11日（禮拜六）佇咱義光教會是真沒閒卻亦真歡喜、真感動的日子！佇早起10點半，50多位兄姊及朋友做伙參加李姮誾姐妹及魏選賢兄弟的結婚感恩禮拜，咱眾兄姊及游皓如姊妹、今健次先生做伙歡喜，咱感謝上帝2年前（2010年）4月10日，仝款佇禮拜六，佇咱義光教會舉行今健次先生及游皓如姊妹真特別的結婚感恩禮拜，是用日語證婚（邀請牧師公鄭連德牧師主理）通互新郎通過基督信仰了解上帝配合、賜福婚姻的意義；咱教會聖歌隊亦特別練習第一遍用日語吟唱祝福的詩歌！2月11日是皓如姊唯一的千金姮誾及女婿選賢佇咱義光教會領受上帝的賜福及眾兄姊的祝福，2年中間母女（媽媽及查某子）2人攏佇義光教會舉行結婚感恩禮拜，這是義光教會的「新紀錄」亦是上帝賞賜咱義光教會至大的福氣！
2月11日下2點，「台灣聯合國協進會」青年團主辦放映「牽阮的手」紀錄片佇咱教會，有真多青年人及台灣鄉親前來觀看，咱教會的椅子坐滿滿，閣有真多人徛啲看，超過80人做伙「洗目睭」。紀錄片中間通過動畫及田秋堇立委口述回顧1980年2月28日「林家血案」的情景，閣有1989年4月7日鄭南榕先生自焚成做「台灣建國第一烈士」的「動畫」，這些為著「台灣民主政治犧牲、受苦的歷史實況」互多多人感動流目屎，亦互大家閣一遍清楚了解台灣民主怎樣通過真多生命的苦難及奉獻，才有今日咱享受的「民主成果」！
看完紀錄片，田媽媽主持座談會以後，有一陣青年人繼續留啲教會及田媽媽討論，教會的清潔工作亦開始沒閒。佇大家真沒閒的時陣，有一位將近90歲的老太太進來教會，請人幫忙關電燈！後來我及她去到厝，佇沒辦法修理開關的情形，最後將電燈拔下來，互她及50幾歲的查埔子暗時卡好睏。佇這個過程互我思考及學習-基督信仰及上帝賞賜的活命米糧豈有提醒、引導咱成做「受苦生命」的盼望及祝福？
今早起咱做伙研讀約翰福音6章26-37節，通過耶穌親身對門徒及眾人的教示，互咱呣那再次學習上帝的話怎樣成做咱活命的米糧，亦提醒咱怎樣見證上帝的話成做別人生命的盼望及祝福：
1. 上帝的話真正是咱生命的倚靠及盼望：
會記得頂禮拜咱佇約翰5：39聽見耶穌對眾人講：「恁研究聖經，因為恁想，佇彼內面會找到永遠的活命。其實，就是聖經為著我做證。」約翰第6章一開始，咱看到耶穌佇加利利海邊宣揚上帝國的救恩，憐憫、體貼群眾的枵餓，耶穌通過一位小傼囝仔的「五餅二魚」行神蹟互5000人吃飽閣剩12籃的魚及餅！後來耶穌的學生及耶穌本身佇暗冥過加利利海到對岸的迦百農，佇過程中耶穌行湖面就近船，佇眾人驚惶中，耶穌叫呣免驚，做伙上船平安到對岸。隔日，群眾亦到對岸找到耶穌，耶穌對講：「我實實在在給恁講，恁找我，是因為有餅吃到飽，呣是為著看到神蹟。呣通為著會敗壞的吃物打拼，著為著長久佇啲，通互人得著永遠的活命彼個吃物來打拼，就是人子欲互恁的，因為父上帝已經給伊蓋印認定。」（26-27節）」
耶穌提醒咱人類呣通為著會敗壞的物質打拼，著致意為著「永遠的活命」打拼，這個永遠的活命是上帝通過耶穌基督的救贖賞賜互咱！上帝的話就是見證耶穌基督的救恩必然帶互相信、接納的人重頭生閣復活的新生命；所以咱每一位基督徒攏通過耶穌的應允及賜福，親身體驗並清楚、確信告白--「上帝的話真正是咱生命的依靠及盼望」。
2. 上帝的話引導咱生命的分享及見證：
約翰6：28-33記載耶穌邀請群眾相信祂是上帝所差派的基督（彌賽亞），但是群眾卻反轉要求耶穌閣行神蹟互看來相信。耶穌一方面提醒，上帝通過摩西引導列祖出埃及的拯救事件，摩西並沒賞賜每日的食物嗎哪，是上帝的權能及疼痛賞賜對天來的吃物嗎哪互以色列族群得著飽足。另外一方面耶穌進一步勉勵講，上帝賞賜的嗎哪呣那是肉體需要的吃物，閣卡重要是表明上帝賞賜「生命及心靈的靈糧」，互以色列族群成做「上帝國的勇士及精兵」通開闊上帝國！
耶穌後來對確信宣告講：「我就是互人得著活命的餅，來我遮的人一定枵。信我的人一定嘴乾。（35節）」耶穌佇37節繼續講：「父所互我的人攏會來我遮，來我遮的人，我決斷給伊棄拺。」甚至佇47-48節耶穌再次重複宣告：「我實實在在給恁講：信的人有永遠的活命。我就是互人得著活命的餅。」耶穌佇49-58節亦進一步說明，祂為著世間人類奉獻自己生命是欲賞賜人類永遠的活命，特別通過吃祂的肉閣飲祂的血，通及耶稣成做一體並經驗真正永遠的活命！
每一遍咱有福份守主的聖餐，及主同坐桌，領受耶穌基督為咱打破的身軀以及為咱犧牲、流出的寶血，咱呣那告白已經體驗永遠枵閣嘴乾的活命，閣卡重要是咱亦再次決志、委身親像耶穌基督仝款，歡喜甘願犧牲、受苦，分享閣見證上帝的恩典及疼痛，引導多多人接納耶穌基督的救恩以及永遠的活命。其實咱每一遍參加主日禮拜、查經班、祈禱會以及各種聚會，咱攏學習佇上帝的話更新咱的生命及信仰，閣卡活出上帝歡喜閣純全的旨意！
今早起咱繼續邀請2位兄弟分享參加大安小組及查經班的見證，成做咱大家讀經的鼓勵及學習：
（1） 陳慶福兄弟（大安小組）
（2） 林擎天兄弟（查經班）
