迫切的祈求／鄭英兒牧師

以弗所3：14-21

親像使徒保羅跪落佇天父的面前為著以弗所教會以及初代教會每一位基督徒祈求，我亦迫切為咱義光教會所有的長執、信徒、兄姊向上帝祈求：

1. 聖神的氣力勇壯咱的活命：
弗3：16保羅誠懇講：「我對祂祈求，照祂豐富的榮耀，通過祂的聖神所賜的氣力，互恁內在的活命勇壯。」（現代台語版本）（紅皮漢羅版本：我祈求上主，對伊豐盛的榮耀，通過伊的聖靈賞賜恁力量，互恁內心堅強起來。）
懇求聖神時刻的同在閣加添咱信心及氣力，引導咱及上帝的關係愈堅固，活命日日愈勇壯！

2. 堅強的信心確認基督的同在：
弗3：17保羅繼續講：「我嘛祈求基督會因為恁的信來佇恁心內。」（現代台語版本）（紅皮漢羅版本：也互基督通過恁的信心來住tòa恁心內。）

耶穌基督呣是2千年前流傳的「傳奇人物」或「聖經故事英雄」，耶穌是真正道成肉體為著人類的救贖犧牲自己生命的基督---救世主！耶穌為著全人類的罪過受釘死十字架，3日後佇上帝的權能得著復活，互人類每一個人願意相信、接納就會當及耶穌基督仝款經驗復活的新生命！聖神引導咱建立堅固的信心，確認基督時刻的同在及相同行！

3. 基督的疼痛真實做咱生命的根基：
弗3：17保羅第3項祈求講：「互祂的疼做地基得著落實。」（現代台語版本）（紅皮漢羅版本：我祈求恁會當在愛心上釘根打地基。）保羅繼續佇弗3：18-19提醒勉勵講：「互恁會當得著氣力及上帝所有的子民攏明白基督的疼偌呢長、闊、高、深，閣經驗那個超過人的知識所會當了解的疼，互上帝的完善給恁完全充滿。」

弗3：14-21，標題：現代台語版本：基督的疼。紅皮漢羅版本：基督的寵愛。台語漢字版本：明白基督的疼。

保羅迫切祈求基督的疼攏會當真實成做每一位基督徒生命的根基！互咱所有的基督徒攏因為經驗上帝通過基督的疼賞賜互咱超過有限的人類所體會、了解的疼。

基督的疼超過人所體驗的長闊高深，並引導咱真實經驗並告白上帝的權能及完全！

我懇切祈求上帝引導帶領咱義光教會全體長執、兄姊攏共同經驗閣確信基督的疼痛真實做咱生命的根基，通做伙建立「疼的生命共同體」！

保羅互以弗所信徒的批佇第3章的結束（弗3：19-20）按呢勉勵講：「上帝會當用祂佇咱中間啲運行的大能力，大大超過咱所求所想的，來成就一切。願榮耀佇教會中，通過基督耶穌歸互上帝，到世世代代，無窮無盡，阿門！」

懇求上帝的權能及氣力時刻保守、帶領、賜福咱義光教會全體長執、信徒，通過每日生命的犧牲、受苦、關懷及行動，歸榮光上帝，造福全民，亦真實成做「台灣盼望的記號」！