活命的米糧（3）

敬疼的兄姊，咱做伙回顧過去2禮拜，咱主日禮拜的講道：
2月12日咱通過詩篇119：105-112詩人的信仰告白做伙學習通過2方面告白聖經-上帝的話是咱活命的米糧：
（1） 上帝的話是咱人生道路的光及燈。
（2） 上帝的話是咱生命永久的產業。

2月19日咱通過提摩太後3：14~17保羅對年輕的基督徒亦是同做福音勇士的同工提摩太所提醒、勸勉勵的「聖經觀」，這呣那是保囉自己的信仰體驗，閣卡是他期待每一位基督徒共同的見證；真重要的信仰課題仝款啲要求「聖經-上帝的話是咱活命的米糧」：

（1） 上帝的話是咱經驗生命得救的確信
（2） 上帝的話是咱信仰及生活的準則。
今早起咱做伙研讀約翰福音第5章及第20章，咱欲進一步看見耶穌本身的「聖經觀」以及初代教會對聖經的態度，互咱時刻攏閣卡歡喜確信及告白--「聖經是上帝的話，真正是我活命的米糧」：

1. 上帝的話引導我找到永遠的活命：
約翰5章30-47節的主題是「為著耶穌做證」，就是見證耶穌道成肉體神聖的使命。這是耶穌宣揚上帝國拯救福音的初期面對的問題及必須要的宣告，通互以色列人清楚確信耶穌的身分及使命！這其中包括5項見證：（1）父上帝：37節耶穌講：「差我的父已經親身為著我做證。」（2）施洗者約翰：33節 耶穌講：「恁曾派人去見約翰，他有為著真理做證。」（3）耶穌的作為：36節耶穌講：「不過我有比約翰卡有能力的見證。父交待我完成的工作，就是我現在啲做的工作，會當為著我做證，表示父有差有。」（4）聖經：39節耶穌講：「恁研究聖經，因為恁想，佇彼內面會找到永遠的活命。其實，就是聖經為著我做證。」（5）摩西：46節耶穌講：「恁若真正有信摩西，嘛會信我；因為他有寫我的代誌。」

耶穌非常明白閣清楚、確信的宣告：舊約聖經所有的記載就是為著祂做見證，見證祂欲成做上帝賞賜互以色列人及全人類的拯救者（彌賽亞），亦是基督！耶穌說明佇舊約聖經以色列族群及上帝的信仰關係，已經指出將來的拯救者（彌賽亞）就是祂本身；所以研讀聖經就會認識耶穌，亦會找到耶穌賞賜永遠的活命！非常可惜閣遺憾，親像40節耶穌繼續講：「按呢，恁猶久呣肯來我遮得著活命。」

聖經（包括舊約及新約）攏清楚引導咱了解、接納、相信耶穌基督道成肉體賞賜全人類的救贖及恩典，咱歡喜親近就會找到並時刻體驗永遠的活命！約翰17：2-3耶穌對上帝祈禱講：「祢有將統治萬民的權柄賜互子，互祂通將永遠的活命賜互一切祢交待的人。永遠的活命就是：認識祢是獨一真神，閣認識祢差來的耶穌基督。」

2. 上帝的話提醒咱謙卑信靠的生命：
約翰福音20章30-31節通講是這本福音書原始的草稿所準備的結論，約翰福音第21章是後來增加的附錄。

約翰20：30-31的標題：「這本冊的目的」，這是真特別的記載，互咱閣卡清楚約翰福音寫作的目的及讀者及對象是什麼人！
約翰20：30-31現代台語版按呢記載：「耶穌佇門徒的面前猶行真多神蹟，沒記載佇這本冊。記載這些是欲互恁信耶穌是基督，是上帝的子，閣互恁通過信，靠祂的名得著活命。」紅皮漢羅版31節：「記載佇這本冊這些代誌，是為著欲互恁相信耶穌就是彌賽亞，就是上主的囝；也通互恁通過這些信心，倚靠伊的名來得著性命。」大多數聖經學者研究這本用希臘文字的福音書得到共同的結論就是約翰福音是為著初代教會的基督徒所寫的！

約翰福音的內容時常關心怎樣加強基督徒佇基督信仰的理解及認識，特別是部分相信或是表面相信的基督徒，必須要閣卡堅定確信自己及耶穌基督的關係！親像31節所提醒，基督徒應該確信--「耶穌是基督，是上帝的子」，並且咱的生命是因為相信、接納耶穌基督通過十字架的犧牲得到真正復活閣重頭生的生命！這呣是咱自己努力打拼得著的活命，是信靠耶穌基督才通得著的生命。所以基督徒一生的年日及生活，咱著時時刻刻謙卑信靠上帝，活出上帝的歡喜！

約翰福音的作者提醒每一時代的基督徒，當咱有福份接觸、親近、研讀「聖經-上帝的話」，咱閣卡學習：（1）清楚上帝對咱的要求及期待。（2）相信耶穌基督的救贖及應允。（3）把握上帝賞賜互信靠基督的人永遠的活命（上帝時刻的同在及同行）！
今早起特別邀請3位兄姊分享參加大安小組及查經班的見證：
洪增陽執事（大安小組）
沈美秀姊妹（查經班）
李騰軒執事（大安小組及查經班）
願佇「活命米糧」的見證成做咱共同的勉勵及學習！