上主的福氣／鄭英兒牧師

馬太5：3~12

馬太5-7章是耶穌「山頂的教示」（現代台語譯本）（紅皮漢羅：山上的教訓。台語漢字：山頂寶訓。）

其中5：3-12是大家真熟的「真有福氣」（現代台語）（紅羅：實在的福氣。台漢：論福。）這是耶穌親嘴宣告「新的時代」亦是現今就會體驗「上帝國的福氣」亦通講是人類時刻就會當享受「上主的福氣」！

比較馬太5：3-12及路加6：20-26，清楚發現耶穌佇馬太第5章3-12節宣告「9福」（呣那只有「8福」！）路加6：20-26是耶穌宣示的「福氣及災禍」，包括有4福及4禍。聖經學者認為路加的記載是原始的版本，比較簡潔，直接閣卡坦白提出信仰的挑戰。馬太的版本並沒改變耶穌原來的意思，總是說明閣卡詳細、明白、清楚！今早起咱做伙來學習耶穌賞賜互全人類「上主的福氣」：
1. 心靈散赤的人真有福氣，因為天國是此款人的。（紅漢：知影著倚靠上主的人，實在有福氣，因為會成做天國的子民。台漢：心內喪鄉的人有福氣，因為天國是的。）（馬太5：3）
承認自己的靈性非常欠缺，心靈謙卑痛悔的人，才有可能接受耶穌基督的救恩，成做上帝國的子民。
2. 憂傷的人真有福氣，因為上帝會給安慰。（紅漢：為著罪過悲傷的人。台漢：憂悶的人。）（馬太5：4）上帝的疼痛安慰一切生命受壓迫、承擔多多罪過，無法度體會人生的意義，時常佇憂傷痛苦的人。
3. 溫柔的人真有福氣，因為上帝會互承受所應允的土地（馬太5：5）。雖然佇人類世界是強權的人擁有權力、土地、名位，總是上帝國的價值觀完全沒仝款，土地、家園是屬佇謙卑、溫柔、和好的人，因為是相信閣倚靠上帝的子民，會領受上帝應允賞賜的一切。
4. 枵嘴乾欣慕上帝旨意實現的人真有福氣，因為上帝會互飽足。（紅漢：熱切渴望欲實行上主的旨意的人，實在有福氣，因為上主會互滿足。台漢：枵嘴乾欣慕義的人）（馬太5：6）上帝國的新時代是充滿公義、信實的時代，是舊約先知預言的彌賽亞時代，上帝的拯救會帶來人類生命的盼望，亦欲提醒人類彼此互相尊重、彼此相疼、公義相待的責任。
5. 憐憫的人真有福氣，因為上帝會給憐憫。（紅漢：用仁慈對待人的人，實在有福氣，因為上主會用慈悲對待。）（馬太5：7）上帝的本質充滿憐憫、疼痛，成做上帝國的子民攏深深體驗閣見證這種福氣。基督徒呣那自己體會上帝的疼，閣卡積極、主動實踐憐憫、疼惜生命的信仰責任。
6. 心清氣的人真有福氣，因為會見著上帝。（紅漢：心肝清潔的人實在有福氣，因為會看見上主）（馬太5：8）內心誠實、正直、坦白的人，才有可能及上帝建立親密的生命關係，每時每刻若沒用心靈及誠實親近上帝，就沒可能見會到上帝，閣卡沒可能體驗上帝的同在及同行！
7. 促進和平的人真有福氣，因為會成做上帝的子兒。（紅漢： 促進和平的人，實在有福氣，因為上主會承認做囝！）（馬太5：9）上帝創造宇宙萬物及全人類，上帝特別照祂的形象創造人類，互人類彼此和睦相疼，並領受上帝「盡忠管家」的責任及上帝做伙管理世界。耶穌是先知以賽亞預言「和平的君王」（賽9：6），甚至最後犧牲自己生命，促成「人及上帝恢復和好合宜的生命關係」。咱每一位基督徒攏是上帝的子民及兒女，咱著打拼成做促進和平的人！
8. 為著實踐上帝的旨意受迫害的人真有福氣，因為天國是此款人的（紅漢：為著實現上主的旨意來受迫害的人，實在有福氣，因為會成做天國的子民！台漢：為著義曾受窘逐的人有福氣！因為天國是的。）上帝及以色列民族「拯救史」的經驗清楚明白上帝的公義-上帝忠實遵守祂及以色列子民所立的約。基督徒是上帝的子民，為著實踐上帝的旨意，表明咱對上帝的忠誠、順服及信實，咱親像耶穌受苦的奴僕仝款！佇咱的苦難及受壓迫的經驗閣卡見證真正的基督徒身份！
9. 為著我的緣故，人給恁侮辱、迫害、講逐款壞話毀謗，恁真有福氣。著歡喜快樂，因為恁佇天頂的報賞真大，恁以前的先知嘛bat按呢受迫害。（紅漢：恁若為著我，互人侮辱、迫害、用種種的歹話毀謗，就實在有福氣。 著歡喜快樂，因為佇天頂有真大的報賞欲互恁，因為古早的代言人也是按呢受人迫害）（馬太5：11-12）初代教會以及二千年來的基督徒攏時刻啲見證，為著基督信仰的緣故受迫害、受艱難困苦、受毀謗、受陷害、犧牲生命、殉教，這是基督徒的特權。親像保羅佇腓立比書1：29告白講：「因為上帝呣那有賜恁特別的恩惠來信基督，嘛互恁為著基督受苦。」當咱為著基督受苦，咱著歡喜快樂，因為上帝呣那及咱做伙受苦，加添咱信心及氣力，上帝賞賜閣卡大的福氣互咱，這是每一位跟隨耶穌的基督徒一生「生命的見證」！

上主的福氣-「9福」時刻提醒咱心存謙卑、誠實、信靠上帝領受使命及責任，盡忠、順服、打拼實踐上帝旨意，咱就欲時刻「榮光上帝，造福眾人」！