活命的米糧（2）

提後3：14~17
鄭英兒牧師
2012.02.19

前一禮拜收到一封轉寄來自一個牧師E-MAil的信仰小品：「你是耶穌嗎？」內容講起一群推銷員做伙參加一個銷售會議，大家約定會議結束一定轉去厝裡吃暗頓，這是及自己牽手的約定。總是會議結束的時卡慢，趕緊到佇機場，大家手拿機票用跑的往機門趕去，其中一位推銷員沒意中撞倒一條賣蘋果的長椅，蘋果攏落佇地面。但是因為欲趕時間，那位銷售員沒處理這個情形，繼續趕到機門，最後豋上飛機。但是這時才發現減少一個同事，因為他看到被撞倒的長椅及賣蘋果的女主人，感覺同情，他請同事呣免等他，請轉去的時通知他的牽手他會坐下一班飛機轉去。當他行轉來長椅的所在，真著驚賣蘋果的女主人竟然是一個目睭沒看著（盲人）小傼查某囝仔，她啲哭，手摸地面，欲找蘋果，卻攏找沒。機場內面真多人，但是沒人停落幫忙，亦沒關心發生什麼代誌。那個推銷員將蘋果一粒一粒揀轉來並將長椅架好，這時他發現真多蘋果已經摔爛，他就對這個查某囝仔講：「請你將這一百元收去，當做是阮對妳造成損失的賠償，你沒按怎吧？」查某囝仔點頭將錢收起來，推銷員繼續講：「盼望沒浪費你這一日」就欲離開。查某囝仔大聲喊：「先生你是耶穌嗎？」那位推銷員注目看這位目睭沒看著的查某囝仔，呣知欲怎樣回答，過幾分鐘就慢慢轉過身，慢慢行向登機門，心中一直思考查某囝仔所問的問題：「你是耶穌嗎？」

豈呣有人以為你是耶穌基督嗎？其實這豈就是咱基督徒一生努力的目標啊！咱若認識耶穌基督，咱就應該學習佇每日的生活學親像祂仝款。

這篇信仰的見證互我真大的課題-基督徒佇每日的生活是呣是呣知怎樣活出「基督款式」？或是咱基督徒「真困難」，甚至「沒法度」活出「耶穌基督的款式」？或是真多時陣咱因為「自己的決定及選擇」暫時或暫停基督徒的「身份」？這攏是咱著誠實面對的問題！

頂禮拜日（2月12日）講道中通過詩篇119：105-112，咱對2方面做伙學習「聖經-上帝的話真正是咱活命的米糧」：（1）上帝的話是咱人生道路的光及燈；（2）上帝的話是咱生命永久的產業。

今早起咱欲通過保羅佇初代教會對年輕的基督徒提摩太的勉勵及提醒，互提摩太及每一時代的基督徒歡喜告白-上帝的話真正是我活命的米糧。

1. 上帝的話是咱經驗生命得救的確信：
提摩太後書3：14-15保羅對提摩太按呢勉勵講：「總是你著持守所學習所深信的道理，因為你知這些是對什麼人學習的。你嘛知你對小傼就明白聖經，這個聖經會當互你有智慧通通過信基督耶穌得著拯救。」佇提摩太書書信一開始提摩太前書1：2，保羅稱呼提摩太是「信仰上我真的子」，咱通清楚看出保羅及提摩太中間親密的關係，特別是通過共同的基督信仰帶互佇上帝的疼痛內面成做生命共同體的肢體親密關係。咱通過使徒行傳16：1-6了解保羅第2次傳道旅行時，提摩太加入保羅及西拉的行列做伙傳福音，並擔任的助手。提摩太的母親是猶太人，老父是希臘人，他可能是佇保羅第一次傳道旅行中間受保羅引導帶領成做基督徒。根據聖經學者研究，保羅可能是主後65-67年受軟禁佇羅馬的時寫提摩太後書互提摩太。提摩太後書1：3-7保羅按呢寫：「我感謝我及列祖仝款用清氣的良心敬拜的上帝，我冥日祈禱的時思念你沒息。我想到離別的時你啲流目屎；就真愛見你，通互我充滿歡喜。我記得你有純真的信心，這個信心你的外嬤羅以及你的老母友妮基先有，我相信現在你嘛有。因為按呢，我提醒你，我給你按手的時上帝互你的恩賜，著互它親像火閣toh起來。因為上帝互咱的呣是驚惶的心靈，是氣力、仁愛及自制的心靈。」

提摩太後書3：14保羅閣一遍提醒提摩太著持守所學習所深信的基督信仰，因為這些真多是保羅對他分享及教示他的，通講保羅是提摩太基督信仰的導師及教師！15節保羅亦提醒提摩太，他對小傼有得著外嬤羅以及老母友妮基的引導及培養，互他對舊約聖經（摩西五經、以色列族群及上帝的信仰歷史，大小先知的書信、詩篇及智慧文學...）有清楚的認識及接觸，所以通過聖經-上帝的話他會得到上帝賞賜的智慧確信上帝差來的耶穌基督，並佇接納、信靠耶穌基督的救贖得到生命的拯救及重頭生！保羅非常堅定相信-對聖經所記載上帝救贖人類（特別是以色列族群）的見證，閣相信上帝藉耶穌基督道成肉體的救贖，咱會親自經驗生命得救的確信！

2. 上帝的話是咱信仰及生活的準則：
提摩太後書3：16-17保羅繼續對提摩太分享他的「聖經觀」講：「全部聖經是受上帝的靈感寫的，對教導，對督責，對糾正，對訓練人行正路，攏有利益，互服事上帝的人裝備好勢，通做逐項好事。」 保羅清楚確信，全部的聖經是通過上帝聖神的引導、感動真多人所寫落來的，目的是欲互讀聖經的人通過研讀、相信、接納、實踐的過程，互相體驗聖經-上帝的話呣是成做一種學問、知識或理論，聖經-上帝的話是佇咱現時的日常生活中間會通經驗、體會及實踐的信仰幫助、參考及建議！1985年咱台灣基督長老教會佇第32屆總會通常年會中通過歷史上真重要的「台灣基督長老教會信仰告白」，其中的「聖經觀」按呢告白講：「阮相信，聖經是上帝所啟示的，記載祂的救贖，做阮信仰及生活的準則。」 這是對咱長老宗的信仰立場及基礎真簡單、真清楚閣非常誠實的「聖經觀」，互咱時時刻刻確信--「聖經」呣是成做「百科全書」或「萬用手冊」，聖經-上帝的話是咱活命的米糧-做咱信仰及生活的準則！

今日咱研讀聖經面對3大問題及困難：（1）時間及空間的距離：離咱最近的福音書及保羅書信是將近2000年前的作品，咱面對「世界觀」真大的差別。（2）時代背景及文化風俗的差別：以色列的風俗習慣、文化傳統、生活方式及咱台灣有真大的沒仝款，亦真困難了解。（3）生活語言及聖經語言沒仝款：舊約是用希伯文所寫，新約是用希臘人所寫，耶穌的時代大多數以色列人使用當地語言亞蘭語。每一種語言有自己的特色及用法，咱台灣人真困難用希伯來文及希臘文研讀聖經。感謝上帝通過真多人（尤其是外國的宣教師）將聖經翻譯做當地人使用的聖經閣通過聖經公會的出版，互每一個國家、每一個族群通用自己的母語來了解上帝的話，咱亦因為「父母語」的使用，閣卡實際、密切互上帝的話成做咱佇這個時代-信仰及生活的準則及幫助！

2011年1月4日開始，每禮拜二暗時的「查經班」互我個人得到真大的學習及成長，一年多來平均參加人數是6.3人。人數雖然沒真多，但是參加的長執、兄姊做伙研讀、討論、分享「上帝的話」是非常歡喜的經驗，這亦是6年多來「大安小組」兄姊做伙「讀經」共同的感受及心得。願上帝賜福咱義光教會眾兄姊閣卡決志親近聖經，因為咱歡喜告白上帝的話真正是我活命的米糧，引導我日日平安閣喜樂，時刻打拼成做「上帝盡忠的奴僕及差用」！

今日是總會所訂「原住民事工奉獻主日」佇總會原住民宣教委員會準備的奉獻袋通看見的事工經費包括族群聖經翻譯需要50萬元，請兄姊共同關心、支持台灣原住民教會的宣教福音事工，引導閣卡多台灣原住民同胞成做「上帝國的子民」！