活命的米糧

詩篇119:105-112    

鄭英兒牧師

2012.02.12

    台灣教會公報第3138期第3版報導一個互我真著驚的消息，今年1月30日~2月4日台灣基督長老教會大專事工委員會佇長榮大學舉辦第49界聖經神學研究班（簡稱「神研班」）主題研讀「羅馬書」，參加學員竟然是突破紀錄的507人！這其中包括將近100名友好教派的青年，其他400名攏是咱台灣基督長老教會的大專生、青年及信徒（2011年開放總會事務所的助理及幹事亦通報名參加）。總會助理總幹事許承道牧師是目前大專事工委員會負責幹事，他特別提起「神研班」是台灣基督長老教會最大的品牌，成做一種青年運動！看見這呢多青年及大專基督徒願意認真投入參與「讀經運動」，就深深體會「教會的未來」充滿盼望及信心！「神研班」呣那提醒、幫助參加的學員學習正確的讀經態度，閣卡鼓勵「信仰及生活」的結連，了解時代處境，盡力佇基督信仰立場，勇敢關心回應社會，善盡公民責任。

    1977~1979年佇我大學時代4遍參加總會大專「神學班」，1982~1998年擔任神研班的輔導（沒論身分是神學生、大專工作者或者總會幹事），每一遍參加神研班攏護我得到真大的「信仰課題」，沒論是自己研讀聖經的「得著」（上帝通過聖神的感動、啟示及引導）或是別人研讀聖經的問題、困難、挑戰、心得、感受......等，攏閣卡深深確信「聖經」確確實實是我「活命的米糧」，幫助、帶領我時時刻刻經驗真正的平安及喜樂！

    今早起通過詩篇119：105~112，咱作伙學習「聖經－上帝的話」真正是咱「活命的米糧」：

1、上帝的話是咱人生道路的光及燈：

    詩篇119篇是詩篇中篇幅最長的一篇，總共176節，是一首「字母詩」，由22詩段組成，每詩段8節，全部用該字母開始。119篇重視「上帝的律法」，有8個名詞輪流使用代表上帝的律法：律法、法度、訓詞、命令、典章、話、道、應允。通過詩歌互咱閣卡重視上帝的律法成做人生及生命的幫助！今早起咱研讀105~112節是第14段詩，詩人面對苦難以及受壓迫的情境，猶久確信上帝的話欲成做人生及生命的引導。

    105~112節的標題：耶和華律法的光（現代中文譯：上主法律的光）。105節詩人歡喜告白講：「你的話做我腳前的燈；做我路上的光。」（現代中文譯本：「你的話是引導我腳前的燈，是我人生道路上的光。」）詩人的人生及生命經歷深刻、真實閣清楚的告白：「上帝的話親像燈火引導、照明向前人生的歷程，互我勇敢跑走生命的道路。」這是咱基督徒非常重要閣誠實的信仰告白，亦是基督徒信仰學習及建立的目標！詩人因為真實經驗上帝的話是伊人生道路的光及燈，所以佇106節繼續告白講：「你公義的判斷，我曾咒誓欲遵守。我決斷按呢行。」（現代中文譯本：「我要持守嚴肅的諾言，遵行你公義的教訓。」）

    107~108節詩人雖然經歷生命的苦境，但是上帝應允賞賜新生命，所以詩人對上帝獻出感謝、謳咾的祈禱，並且進一步懇求上帝將祂的命令教導伊，互伊通遵趁實踐。詩人鼓勵咱仝款佇天路歷程的學習一遍閣一遍經歷上帝是咱人生道路的光及燈，引導咱閣卡成做上帝歡喜的兒女！

2、上帝的話是咱生命永久的產業：

    詩篇119：109~112詩人分享講：「我的生命常常面對危險，猶久我沒記得你的律法。歹人設羅網欲害我，總是我沒偏離、違背你的命令及教示。我欲將你的誡命及干證的話做永遠的基業或是永久的產業，這是我心內的歡喜及喜樂。我決意欲遵守祢的律法，永遠遵趁，直到路尾離開世間。」現代中文譯本佇109節「我的生命時刻在危險中，但我沒記祢的法律。」有另外一種翻譯：「我隨時通捨命，但是我沒記祢的法律。」這是詩人及基督徒閣卡積極的生命態度，甘願、歡喜為上帝犧牲生命；因為上帝的話是咱永久的產業！

    109~112節通講是咱基督徒非常重要的「生命觀」，咱清楚確信上帝的話是咱生命永久的產業，所以咱充滿喜樂並一生堅持遵趁上帝的命令及教示，直到生命的結束！

    佇3138期台灣教會公報第4、5版，是真特別的「情人節」信仰見證，主題是：「在情人的眼淚中，看見愛的真諦」；對情人節來源的一種講法，紀念秘密替人證婚的Valentine修士佇主後273年2月14日受處死，每年2月14日提醒咱紀念人類追求真愛的自由，以及耶穌基督犧牲的疼成做所有基督徒「疼的典範」，鼓勵咱通過「婚姻及家庭疼的課題」學習「疼的見證」！佇5篇的見證中，3對牧師夫婦的生命經歷互我真大的感動及啟示：(1)高俊明牧師及李麗珍長老夫婦－－甘願背十架，牢獄分隔猶同心；(2)賴德卿牧師及葉茂竹師丈－－珍惜擁抱情，盡責傳愛牧主羊；(3)陳福春牧師及顏敏珠牧師娘－－讚美勝苦難，用心經營靠上帝。攏確信上帝的話是生命永久的產業，亦是人生道路的光及燈；願咱每一位兄姊亦仝款歡喜時刻告白「上帝的話是我一生活命的米糧」！因為保羅佇提摩太後書3章14~17節按呢講：「總是你著持守所學習、所深信的道理，因為你知這些事對什麼人學習的。你嘛知你對細傼就明白聖經，這個聖經會當互你有智慧通通過信基督耶穌來得著拯救。 全部聖經是受上帝的靈感寫的，對教導，對督責，對糾正，對訓練人行正路，攏有利益，互服事上帝的人裝備好勢，通做逐項好事。」