落實疼的學習(3)／鄭英兒牧師

回顧一月份第一主日（1月6日），咱兄姊做伙通過約翰13：12-17，34-35耶穌為學生洗腳的生命學習，提醒勉勵「疼的誡命」。這是咱義光教會佇2013年的「教會主題」及「信仰課題」--「落實疼的學習」！

1月13日繼續通過馬可12：28-31耶穌提醒咱第一重要及第二重要的誡命：著全心、全情、全意、全力疼主你的上帝閣疼人的信仰使命！咱閣通過義光教會的「聖經根基」--詩篇89：14-15，共同勉勵佇上帝引導帶領中，咱盡力、打拼成做公義及疼痛的見證，這是咱做伙佇今年「落實疼的學習（2）」的信仰使命！

今早起「落實疼的學習（3）」，咱做伙通過保羅2份書信的「信仰勉勵」，互咱兄姊同得著「信仰的提醒」！保羅寫互歌羅西信徒及佇羅馬的信徒這2份書信有 項痛共同的特色及背景：（1）保羅寫書信的時，攏猶沒機會去到中間。（2）沒論歌羅西教會的基督徒以及佇羅馬的基督徒，攏仝款有猶太教的背景及傳統。（3）雖然沒機會及歌羅西教會的信徒以及羅馬地區的基督徒見面，總是保羅充滿對的關心及疼痛，保羅佇書信中攏切切分享及勉勵，特別通過自己親身體驗的「基督信仰」，提醒著盡力打拼建立「上帝歡喜的活命」--呣那自己得著時刻平安閣喜樂的人生，閣卡歡喜成做別人「生命的盼望」！

1. 盡力結連基督，體驗完整的活命
保羅第3次國外傳道旅行（主後53-56年），他佇以弗所附近地區傳福音有3年多的時間（詳細的記載請參考使徒行傳18-19章）。當時以弗所東邊100英哩的所在，萊克斯（Lycus）河谷有3個都市：老底嘉、希拉波立、歌羅西攏有建立教會，是因為有人佇以弗所聽見保羅分享的基督福音，接納、洗禮成做基督徒，轉去自己的故鄉分享、見證基督福音，慢慢組織、建立教會。以巴弗就是其中的一個（歌羅西1：7，4：12），他成做保羅真看重的「福音勇士」，將上帝國的真理及救恩分享互真多人，帶領有福份學習跟隨耶穌基督的腳步，盡力活出「基督的款式」！

總是佇歌羅西教會的基督徒，因為社會環境以及對基督信仰沒正確的了解，加上當時流行多元的宗教儀式及哲理。包括否定「肉體」的「諾斯底主義」，有人否認耶穌的「道成肉體」，強調否認肉體的「苦修主義」，亦有人反轉成做「看輕道德」、「放縱私慾」。面對其他宗教帶來的占星術、鬼神學、割禮、天使崇拜、宗教儀式，造成歌羅西教會信徒的困擾及危機！

保羅一方面懇切為歌羅西的基督徒感謝祈禱（西1：9-14），一方面清楚確信：耶穌基督是全宇宙及全人類的救主（西1：15-17），耶穌基督佇十字架完成的救恩恢復上帝及人「和好的關係」，並且基督建立世界所有的「教會」！一方面勉勵、提醒，甚至通講是命令及要求：「及基督結連得著完整的活命」（現代台語版歌羅西2：6-19的標題）（台語漢羅版：「基督內生命的豐盛」；紅皮漢羅版：「及基督結合來得著完善的性命。」）

歌羅西2：6-10保羅分2段來提醒歌羅西的基督徒：佇2：8-10保羅有3點的提醒：
第8節：著謹慎，呣通互人用空洞虛假的哲學給恁迷去，因為那些學說是根據人的傳說及支配宇宙的邪神，呣是基督。
第9節：因為上帝完整的神性佇看會著的基督的形體內面。
第10節：互恁及祂結連成做完整。祂是元首，超越一切靈界的統領者及掌權者。

西2：6-7保羅確信並清楚告白：既然恁有接受基督耶穌做主，繼續就提出5項具體的要求基督徒及基督結連得著完整的活命：
（1） 就著及基督結連來生活。
（2） 照所領受的教示，佇基督內面釘根。
（3） 佇基督頂面建立-基督徒的生命及生活。
（4） 互信心得著建立及堅固。
（5） 充滿感謝-時時刻刻感恩。
咱是呣是有盡力結連基督，生活以基督做中心，體驗基督同在完整的活命！

2. 報揚、分享、見證上帝永遠的疼：
「羅馬書」佇現代台語版是：「互羅馬信徒的批」。保羅雖然猶沒機會及見面，羅1：11-12保羅寫講：「我真愛見恁，通及恁分享屬靈的恩賜，互恁堅強；就是我到恁中間的時，恁通過我的信仰，我通過恁的信仰，通互相得著鼓勵。」

羅馬書1：16-17是批信上重要的經文，保羅欲見證亦宣告：「福音的大能力」講：「我沒有看福音做見誚，因為這個福音是上帝的大能力，欲拯救所有信的人，代先是猶太人，後來外邦人。因為這個福音有啟示上帝的義，這個義對頭到尾攏是通過信來得著。照聖經所記載：「義的人會對信來活。」」（現代台語版）

羅馬書8：31-39保羅特別分享、見證-「上帝的疼」；35節保羅問講：「啥人會當切斷基督對咱的疼？是患難，是困苦，是迫害，是枵餓，是散赤，是危險，阿是慘死？」

保羅佇37節清楚回應講：「咱靠疼咱的上帝贏到有剩」繼續佇38-39節保羅進一步清楚表明：「因為我確信，沒論是死，是活，是天使，是靈界的統領者阿是權力者，是現今阿是將來的，是天頂阿是地下的神靈，阿是其他的被造物，攏當切斷上帝通過咱的主基督耶穌對咱的疼！」

最近幾年，這段聖經對我有真大的啟示及感動！尤其是2010年4月25日國道三號走山事件，上帝將葉茂竹師丈（基隆中山教會賴德卿牧師的先生、牽手、屬靈同工）接回「永遠的家」，佇艱苦、目屎、憂傷中間閣卡體驗「上帝永遠的疼」，這亦是賴德卿牧師及2位千金將近3年來「報揚、分享、見證上帝永遠的疼」的「信仰經歷」！

咱佇世間任何境況及實境，無論偌大的艱難及困苦，咱攏盡忠、打拼「落實疼的學習」--報揚、分享、見證上帝永遠的疼、無盡的疼！