訂閱
上一篇
返回
下一篇
落實疼的學習（二）／鄭英兒牧師
作者: gikong 日期: 2013-01-13 12:17
2013.01.13
1月11日（禮拜五）暗時佇愛慈基金會舉辦「感恩餐會」，過去攏佇聖誕節附近舉行，今年改佇新年的開始來舉行。主要的目的是感謝參與「疑似愛滋寶寶」的週末寄養家庭以及「寶寶照護中心」的義工。今年佇感恩餐會的開始邀請我短短的「信仰勉勵」，我用馬太福音25：35-40耶穌最後審判的比喻，彼此勉勵「生命的盼望」的信仰課題。回顧最近2年來，阮的家庭參與「週末寄養家庭」關心照顧「小慈」及「小婕」的過程及學習。我時常回想，WHY（為什麼）欲關心、疼惜沒血緣閣沒關係的生命？總是2年來佇「落實疼的學習」的過程充滿感恩的目屎，雖然有真多呣甘及思念，總是閣卡多「生命盼望」的見證及感恩！
頂禮拜主日禮拜中，我有說明咱教會決定今年主題「落實疼的學習」的經過，亦通過約翰福音13章，耶穌為學生洗腳的「生命服事」及「信仰見證」，提醒每一時代的基督徒攏著「彼此相疼」盡力實踐「新的誡命」！
今早起咱所讀2段聖經是去年咱教會30周年錄製的CD中間，我所分享的聖經節；願咱眾兄姊閣一遍對這2段聖經，共同努力「落實疼的學習」：
1. 上帝引導咱盡力成做公義及疼痛的見證：
1980年2月28日發生林家血案以後，鄭兒玉牧師佇聖神感動、引導及素敏姊討論並決定購買血案的所在成做「教會」，後來欲決定教會的名稱，佇籌備委員會討論過程，接納同意幾位青年牧者的建議號名做「義光教會」，並以詩篇89：14-15成做「教會根基」！真少教會親像咱義光教會有「聖經」的根據做咱非常重要的「使命及責任」，亦通講這是義光教會上重要的「信仰目標」及「生命見證」，是義光教會牧師、長執、信徒、兄姊共同做伙努力打拼的信仰課題！
詩篇89：14-15台語漢字版：「公平及義理是你的寶座的地基；慈愛及誠實行佇你的面前。會識歡喜的聲者，彼個百姓有福氣！耶和華啊，佇你的面所發出的光啲行。」（現代中文譯本：你的國是以正義公道為根基；你所做的一切都是信實慈愛。用詩歌敬拜你的人多麼有福啊！他們生活在你慈愛的亮光中。）詩篇89：16-17：「日日因為你的名來歡喜，因為你的公義得著升高。因為你是氣力的榮光；閣因為你歡喜阮，阮的角欲得著抬高。」
親像台灣基督長老教會信仰告白「教會觀」，咱義光教會的眾信徒佇上帝引導中間，成做公義及疼痛的見證，成做「台灣盼望的記號」！
2. 實踐疼的誡命擴展上帝國：
馬可12：28-31記載耶穌面對經學教師的問題：「所有的誡命中，to一條第一重要？」耶穌應講：「第一是：以色列啊，恁著聽！主咱的上帝是獨一的主。你著全心、全情、全意、全力疼主你的上帝。第二是：著疼厝邊親像疼自己。沒別的誡命比這些閣卡重要。」（現代台語譯本）台語漢字版：耶穌應講：「彼個第一要緊的是講：『以色列啊，著聽，主──咱的上帝是獨一的主。你著盡心、盡性、盡意、盡力疼主──就是你的上帝。』第二個講：『著疼你的厝邊親像家己。』其餘的誡命未有比此二條卡大的。」四福音類似的記載佇馬太22：34-40以及路加10：25-28，尤其是佇路加10章是成做耶穌講出「好的撒瑪利亞人比喻」的序言及引題，現代台語譯本針對路加10：25-37的標題是：「什麼人是好厝邊！」上大的特色及差別佇路加10章是律法教師欲試探耶穌提出的問題：「老師，我著做什麼才會得到永遠的活命？」耶穌應講：「律法有寫什麼，你按怎了解？」那個人就應講：「你著全心、全情、全力、全意疼主-你的上帝（引用申命記6：5），閣疼厝邊親像自己（引用利未記19：18）。」耶穌給他講：「你應了真著，照按呢去做就會得著活命。」這位律法教師為著表明自己是著，就閣問講：「什麼人是我的厝邊？」耶穌就用「好的撒瑪利亞人比喻」來提醒這位律法教師著憐憫、疼惜生命才是真正的好厝邊。
無論耶穌親嘴「宣示」或是經過律法教師的「應答」，攏啲提醒咱「全人」「全生命」疼上帝閣疼人！當咱盡力、打拼疼上帝閣疼人，咱呣那體驗「永遠的活命」閣一步一步「擴展上帝國」！
2012年12月23日下埔，咱教會咱教會將近40位兄姊（包括主日學及少契）及搖滾主耶穌樂團佇捷運新埔站5號出口做伙「報佳音」，亦通過咱的行動為「台灣貧困者關懷協會募款」！雖然氣候非常寒冷，總是咱「疼的學習」見證「耶穌基督的救恩及疼痛」，咱的生命真實跟隨基督分享恩典、疼痛、平安及喜樂互台灣人民！
這期（3176期）台灣較會公報週刊第14-15版：「把愛傳出去-長老教會國際救災回顧」這是台灣基督長老教會「疼惜生命，分擔苦難」真實的「信仰見證」！感謝上帝引導我有福份參與這呢重要「疼痛生命的見證」！
2012年12月29日「展望2013年公義和平音樂祈禱大會」佇雙連教會舉行，邀請蔡丁貴教授分享「司法正義與公民行動」，我第一遍看見蔡教授穿西裝打領帶參加，第一遍看見蔡教授佇講台恭敬一字一字讀出他的講稿，第一遍看見蔡教授一面流目屎一面讀完他的講稿。頂禮拜週報有刊出蔡教授完整的演講稿，這期台灣教會公報週刊第11版有「濃縮版」演講稿。請咱眾兄姊做伙關心疼惜台灣，通過「疼的實踐」盡力成做「台灣盼望的記號」！
