生命的主

申命記10：12~22

2012.01.01

   昨日半暝12點是咱台灣歷史2011年的結束亦是新的1年2012年的開始！最近幾年全世界各國、各地區，包括咱台灣的人民攏真熱情慶祝「跨年」的活動，特別是佇台北市101大樓的「煙火秀」。今年佇全世界真特別的跨年大消息是南太平洋的島國「薩摩西」（Samoa）及托克勞群島（Tokelau）變更時區，互原來是全世界最後進入2012年的所在，改變成做全世界上早迎接慶祝新年的國家，原來比台灣慢18小時，改變後變做比台灣早6小時。為著經濟貿易通及紐西蘭、澳洲有閣卡好的發展，因決定將國家時區對「國際換日線」的東邊換過來西邊，互提早24小時成為全球第一個看到2012日出的國家。雖然失落12月30日1日，但是卻比世界其他各國提早慶祝2012年的來臨！

   咱基督徒及眾教會面對跨年，重點呣是「跨年」活動的熱鬧及歡喜，咱需要學習的是怎樣佇歷史及時間的進程中，閣卡謙卑、學習上帝交託咱的使命及責任---佇充滿感恩及歡喜的心情，感謝上帝講盡的恩典、疼痛佇咱的人生及生命，佇咱的世界及每一個國家及族群！雖然2011年有真多苦難及災害臨到世界真多國家及地區，特別是3月11日日本東北大地震及海嘯、核災所帶來日本人民生命的苦痛及全世界核能的災害危機；但是2日前聯合國的新聞報導特別提起2011年3月11日佇日本東北大地震地區當日出生的11個嬰兒平安、快樂生長的畫面，互全世界人民看見佇生命苦難及目屎的中間，人類的盼望及期待猶原真實臨在。看見這些嬰兒感受真深，因為我及仝一日生日，對2011年以後每遍慶祝生日，呣那感恩母親的「受難」亦閣卡紀念日本大地震的「生命」及「苦難」的課題！

    今早起咱做伙研讀申命記10：12-22，互咱兄姊佇新的一年開始，歡喜告白上帝是咱「生命的主」，咱確信上帝呣那是創造咱的生命，賞賜咱有祂的形像，上帝閣卡盼望咱佇人生的經驗及過程，閣卡確定、打拼活出上帝的歡喜，互上帝國日日得到廣闊！

1. 上帝期待咱敬虔建立真實的信仰：

   聖經學家研究發現佇新約聖經中間，有4本舊約的經卷常受引用（創世記、申命記、詩篇、以賽亞書）。馬太及路加福音記載耶穌欲開始傳道之前佇曠野40日受試探，面對魔鬼的引誘，耶穌3次引用申命記的經文（8：3，6：16，6：13）回應試探者，可見耶穌對申命記的教示真熟亦真清楚。

    申命記通講是以色列民族律法的宣講，特別是摩西引導以色列人出埃及的過程所建立的律法及條例，尤其上重要是上帝通過摩西頒佈的「十誡」，引導、要求、提醒以色列人及上帝建立真實的信仰。

   申命記第10章是以色列人背叛上帝拜金牛，致到摩西受氣摔破第一個「十誡」的石版以後，上帝第二次叫摩西上山再次賞賜「十誡」石版；然後摩西對以色列人說明上帝的期待及要求！申10：12-13摩西講：「以色列啊，今耶和華─你的上帝愛你甚麼啊？豈呣是獨獨愛你敬畏耶和華─你的上帝，行伊一切的道路，疼伊，盡心盡性服事耶和華─你的上帝，守耶和華諸個誡命及伊的律例，就是我今仔日所命令你的，為著欲互你得著福氣嗎？」申10：14-16摩西回顧上帝對以色列的列祖以來的揀選、疼痛及恩典，並提醒以色列人呣通硬心，著佇上帝的面前敬虔建立真實的信仰！上帝赦免以色列人對祂的背叛及沒忠實，閣一遍用憐憫、疼痛邀請以色列人悔改、敬虔及祂建立真實的信仰及生命關係。

    上帝今日亦按呢呼籲、邀請咱時時刻刻敬虔親近祂通建立真實的信仰！

2. 上帝引導咱謙卑實踐信仰的真理：

申10：17-22摩西呣那閣一遍提醒上帝的屬性，他亦確信上帝欲要求閣引導以色列人謙卑實踐信仰的真理。佇17-19節摩西特別講明上帝是至大的上帝，有能力閣通驚畏的，無用外貌取人，亦沒受賄賂。上帝為著孤兒及寡婦判斷，閣疼出外人，互食穿。以色列人著學習上帝的屬性及疼惜弱勢的精神，佇實際生活中間關心出外人，因為以色列人有切身的體驗佇埃及做出外人受壓迫的境遇。摩西繼續佇20-21節要求以色列人著敬畏上帝，忠實服事上帝，謙卑實在順服上帝，就會親目看見上帝奇妙的權能及作為！上帝呣那引導順服祂、謙卑跟隨祂、真正實踐祂信仰真理的人，上帝亦將祂沒盡的恩典、疼痛及賜福通過這些上帝國盡忠的子民臨到世界全人類，尤其是受人輕視、排斥、看起的社會邊緣人及弱勢者！

雖然咱清楚欲謙卑實踐信仰的真理必然需要付出關懷、行動，甚至受苦及犧牲；親像耶穌基督受釘死十字架成做全人類生命的救贖及盼望仝款，咱基督徒佇天路歷程的學習，咱應該閣卡「高舉十架，跟隨基督」，通過疼痛及受苦，成做「盼望的記號」！

昨日（12月31日）台灣聯合國協進會及西美、台北、七星3中會教社部佇雙連教會共同舉辦「展望2012年公義和平音樂祈禱會」，我受邀講道：「神祐台灣，世界公義」，我特別引用咱義光教會設立的聖經根據：詩篇89篇14-15節及將近700位參與者做伙勉勵，通過義光教會的信仰見證，對流血、死亡、苦痛、目屎的兇宅，因為上帝的疼痛成做時刻分享、平安、喜樂、盼望的義光教會！鄭弘儀先生分享閣勉勵大家他所確信--「台灣會改變」。願上帝引導台灣基督長老教會全體教會及信徒謙卑實踐信仰告白的「教會觀」，通成做台灣盼望的記號！

請咱做伙起立用心靈及誠實齊唸2012年決志文，成做咱新年的決志及委身！

2012年決志文

    我_________是台灣基督長老教會七星中會義光教會的________（牧師、長老、執事、信徒），我決志用謙遜閣卑微的心奉獻自己成做祢盡忠的差用。

    我清楚自己是重罪人，堪得徛佇至尊閣至聖的上帝面前。感謝祢差遣耶穌基督道成肉體擔當阮的罪過受釘死十字架，閣通過耶穌基督的復活成做阮的拯救及盼望。

    我倚靠耶穌基督的救恩，好膽徛佇祢的面前，我確信祢已經赦免我的罪過，歡喜接納我這個軟弱、有限閣時常違背祢旨意的人。佇新的一年的開始，我閣一遍清楚告白祢是我生命的掌權者，我歡喜決志完全屬佇祢！

    鑑察人的心思意念閣充滿疼痛及憐憫的上帝，今仔日佇2012年第1日我用誠實、謹慎閣嚴肅的態度，將自己降服佇祢。我欲將我所有的一切，就是我的生命、心神、能力、身體、時間、財物、金錢，攏完全奉獻互祢，做祢聖的路用，通歸榮光祢的聖名。我決志順服祢的命令，永遠沒改變。我歡喜一世人謙卑順服祢的旨意，盡心、盡性、盡意、盡力實踐祢的教示及託付我的使命及責任。

  清楚了解我的個性、軟弱及缺點卻歡喜用無比的疼邀請、期待、接納我的上帝，懇求祢差遣我，使用我，管教我，引導我盡忠服事祢！

  賞賜信心、智慧及疼心的上帝，懇求祢時常改變我、培養我、訓練我，造就我真實跟隨祢！

  賞賜聖神慰助者成做我的幫助及安慰的上帝，懇求祢加添我的勇氣，帶領我呣驚犧牲、受苦、付出任何代價。壯膽我佇阮義光教會進入設教30週年的重要時刻，再次決志委身奉獻自己，釘根佇台灣本地，認同所有的住民，通過疼痛、犧牲及受苦，成做台灣盼望的記號。阿們！