[佇萬百姓中做見證]

巨星的隕落

／陳柏壽牧師　美國西雅圖　 2011.11.30

『義光』就是『義』發『光』，想著義光，第一當然想著林義雄兄的老母及二位查某囝。in繼續teh發出義理的光輝，傳遍佇全世界的台灣人的心內。

林奐均及伊的先生Joe佇我teh Hawaii作牧師的時，受派去Honolulu訓練作傳道師，有及in作伙三年，知影上帝愛伊去台灣傳道理，是一位真優秀的傳道者。

想著義光心內出現另外二位巨人。一位是田朝明醫師。田醫師及伊的夫人hü-jîn-lâng田孟淑去到日本阮寒舍，入門第一句話伊講：『佇台灣我的he-ku(氣喘）一直bōe好；轉來到你chia ，he-ku就停。我想我是去互KMT的電視及報紙氣到he-ku啦！』

短短的一句話，看出伊一世人的哀傷及掙扎。

日本雖然有伊傳統文化的拘束及限界，但是比起KMT統治60冬的咱台灣社會，日本社會的深厚、自由、寬容、樂觀及理想觀念，實在比咱加真好。莫怪田醫師佇日本就親像魚仔拄著清水，心情加真開放，講話加真輕鬆。

頂年，轉去投票的時，田媽媽帶我去病院探訪田醫師。我知影雖然伊無法度講話，但是這位巨人的心猶呣甘願去，伊無欲放棄，我摸伊的頭殼，猶閣燒燒，目睭猶會起金。

另外一位義光的巨星是台獨聯盟的黃昭堂主席。時時佇越洋電話中，聽著伊豪放的笑聲及幽默的答案。伊忽然別世，是我心內一粒巨星的隕落。

二年前伊將古早佇日本發行的四百外本的原本『台灣青年』雜誌，寄來美國互我，由咱前『台文通信』的賴柏年兄及幾位有志（黃聲宏、陳水簾、黃真救、許文政、李正雄兄等人）的努力，在聰美姊紀念基金會(www.chhongbi.org)的名下，一本一本、一頁一頁，灌入去網站。hiah-e攏是真有價值的歷史資料，記載『白色恐怖』時代每一年、每一項的悽慘的事件。現在猶閣是teh進行當中。

過去佇日本工作的時代黃昭堂主席有邀請我任聯盟要職，但是我攏無接受，一方面因為我是基督教的牧師，特別是因為我及伊的想法真同款：阮無愛出名，阮一世人無愛作官，阮一世人攏欲匿佇草根的土腳，親像一隻bùn-鼠，全生涯佇土底鑽，無必要出頭，我一世人攏繼承伊基本的人生觀。

但是茫茫天海中，in 是永遠不動的北斗巨星，雖然有時in 去互烏雲遮去， 明仔載一定會閣出現。in 佇茫茫大海中，指示千千萬萬孤單的船隻，看清頭前 的航程；in 雖然無閣講話，但是in 背負偉大先知的重擔，teh 指導台灣人獨立 建國的方向。

in 的過身再次提醒咱生命的無常及脆弱，但是聖經內面有寫：『Chiah-e 人攏是存信心死的，雖然並無得著所應允的，但是in 對遠遠望見，又歡喜迎接， 又承認家己在世上是客旅，是寄居的。』（希伯來人書11:13）

敬愛的北斗星，請恁安息，阮一定會追隨恁的腳步勇敢進前！

編按： 『聰美基金台文站』為紀念聰美醫師。她與丈夫伊藤邦幸醫師，在尼泊爾醫療 服務7 年。返日後，以井上魯鈍名義每月贊助發行「台灣青年」。陳柏壽牧師 是「基金會」的理事也是現任總幹事。